IMBESTIGAHAN karon sa kagamhanan sa probinsiya sa Misamis Oriental ang giingong badlungon nga empleyado sa ilang buhatan.

Kini human nadawat ni Governor Yevgeny Emano ang reklamo kalabot sa isyu nga adunay mga transaksyon nga gihimo sulod sa treasurer’s office nga ipasa pinaagi sa usa ka driver nga giila sa pangalan nga Onyot kini aron mahatagan og prayoridad.

Ang complainant nipaabot sa ilang concerns nga si Onyot maoy magsilbing utok aron daw mas mapadali ang transaksiyon sama sa voucher, sweldo sa uban mga empleyado.

Si Provincial Treasurer Marilyn Legazpi nihimakak sa maong alegasyon apan miangkon nga si Onyot empliyado sa kapitolyo apan dili tinoud nga kini maoy mohimo sa transaksyon sa mga dokumento. Gipasabot usab niini nga si Onyot dili awtorisado sa mga transaksyon.

Giklaro usab ni Legazpi nga basi sa protocol ang tanan nga mga dokumento nga moabot sa iyang buhatan mag-agi pa og daghan nga proseso.

Gikan sa midawat nga personahe moabot kini kaniya alang sa pirma ug pinaagi sa acting provincial administrator paingon ngadto sa chief of staff usa moabot ngadto kang Emano.

Gibalik usab niining pagklaro nga driver lamang si Onyot ug dili kini awtorisadong motransak og mga dokumento.

Sa iyang bahin ni Governor Emano giawhag niya ang complainant nga mopasaka og pormal nga reklamo aron mahimoan kini og legal nga aksyon.

Una na gibutyag ni Emano nga bout niyang adunay transparency sa iyang pagpamunoan sa gobyerno ug rason adunay mga suggestion boxes nga nahimutang diha sa kapitolyo.

Gibutyag usab niini nga dili niya kini i-tolerate nga binuhan sa iyang empleyado sulod sa kapitolyo ug imbestigahan kung unsay kamatouran niini.