NAKAANGKON ug duha ka mga samad dinunggaban ang usa ka lalaki human giluba sa kainom niadtong Martes, Enero 31, alas 6:25 sa hapon diha sa Manlauyan, Gango, Libona, Bukidnon.

Nilanding sa tambalanan si Aljun Sollano, 26, ulitawo, lumulupyo sa nahisgutang dapit diin nahitabo ang insidente.

Sa impormasiyon gikan sa Northern Mindanao Medical Center (NMMC) sa Cagayan de Oro gikabutyag nga nag-inom lamang ang wala hinganli nga suspek ug ang biktima.

Giingong samtang kamulo na kini og inom sa ilimnong makahubog nagbikil na ang duha gumikan lamang sa gamay nga estorya kay lage pulos naman ubos sa impluwensiya sa makahubog nga ilimnon.

Nasuko ang suspek sa dihang napildi kini sa ilang estorya ug kalit nga mibunot og kutsilyo dayog duslak sa biktima sa ikaduhang higayon.

Nakaangkon kini og samad sa iyang tiyan ug bukton hinungdan nga dali kining gidala sa NMMC.

Sa pagkakaron, ang maong biktima ang pabilin pa nga nagpaalim sa NMMC ug gi-atiman pa sa mga mananambal.