ILIGAN CITY -- Pormal na nga gi-inagurahan niadtong Lunes, Enero 30, ang footbridge alang sa mga residente sa Sitio Gutom, Barangay Lanipao, ning dakbayan.

Hulip ang maong tulay sa latayan nga kable sa mga residente sa ilang pagtabok sa suba.

Nahimong “viral” sa internet ang video sa magtutudlo nga si Yasmin Mangorsi diin makit-an ang dalagitang si Farida Bansil, kauban ang iyang gamay'ng manghod nga milatay sa latayan aron moadto sa tunghaan.

Daghang mikomento nga delikado kini alang sa mga bata.

Gilayong gimando ni Department of Public Works and Highways (DPWH) Secretary Mark Villar ang pagtukod og footbridge human makit-an ang maong video.

“This is not actual our mandate (because this is the city's concern) but because of the concern of our secretary, we find ways and means to get funding,” matud pa ni DPWH 2nd Lanao del Norte Engineering District Engineer Peter Gille.

Miingon si Gille nga gihuman nila ang maong proyekto sulod lamang sa 32 ka adlaw, gikan sa original duration nga 45 calendar days.

Ang maong tulay adunay gitas-on nga 105 lineal meters ug adunay kinabuhi o life span nga dili mo-ubos sa napulo ka tuig.

“We already have requested the City Government, through the barangay nga sila na ang mag-maintain human ma-turn over ang project ngadto kanila. Kung dunay makit-an nga daut sa mga kahoy, sila na ang mag-replace,” miingon si Gille.