ANG mga kawani ug boluntaryo sa Visayan Electric Co., Inc. (Veco) niayo ug nipanindot sa duwaanan sa mga bata ubos sa New Cansaga Bay Bridge, lungsod sa Consolacion sa ulahing bahin sa miaging tuig.
Usa kini sa mga corporate social activity o proyekto sa Veco alang sa komunidad sa 2012.
Dul-an sa 30 ka mga kawani sa Veco uban sa ilang mga anak ug lokal nga mga lumolupyo ang nahiusa sa pagtuman sa tpuyekto sa dapit.
“Akong gi-invite akong bata para pud ma-expose siya sa ing-ani na mga community service, kaysa sige siya duwa og computer. Bonding pud namo at the same time,” matod ni Jemmy Eya, usa sa mga boluntaryo sa Veco.
Ang mga bata nga nagpuyo duol sa dapit nalipay sa pagpalambo sa bugtong duwaan sa mga bata sa komunidad.
Usa sa mga bata sa dapit nga s ‘Michael’ o Onyok niingon nga ganahan siya sa nindot nga kolora sa plaza ug hamugaway na ang ilang pagduwa sa dapit.
“Nindot. Pirmi na unya mi magduwa dri,” matod ni Gemrose, usa sa mga bata nga kaduwa ni Onyok.
Ang Cansaga playground gitukod sa Veco aron paghatag og luwas nga duwaanan sa mga bata nga anak sa pamilya nga kabus nga nasakop sa ilang franchise area.
Ang plaza nagsuporta usab sa sustainability program sa Veco isip elemento nga ginama sa kahoy nga gikan sa ginuba nga gamit sa kompaniya labi na ang karaang kahoy nga poste.
Sukad niadtong 2012, ang Veco nakatukod na og tulo ka mga playground sa dakbayan sa Naga, Minglanilla ug Barangay Kasambagan sa dakbayan sa Sugbo. (PR)