Ernesto D. Lariosa
San Fernando, Cebu
Di madutlag paak ang panit sa pag-inusara
Kay aninong naghukdong nanikma sa akong kilid
Nakadungog kog hingos-hingos pasiunang pangabli
Sa minatay sa nahimugso nga kamingaw.
Kamaayong atsahon ang gilubgan nga kahilom
Aron motuasik mosinggit ang tungang gabii
Kay way nagtikawtikaw nga mga tiil sa paghandom
Motunob-tunob ta sa labyog ning orasan
sa bungbong.
Ang gisugat hinuon ning akong pag-ubog
sa gabii
Mga blangkong mata sa mga bituong laya na
Nga may kalimutaw nanagsukdip nagtutok kanako.
Miminatay pagsamot ang halawom nga
kamingaw.