WALA nay Project Tok­hang human gimando ni Presidente Duterte nga di na moapil ang mga pulis sa ope­rasyon batok sa iligal nga drugas. Sa ato pa suspendido na sab ang Oplan Double Barrel Alpha paggukod sa mga high value target nga durugista. Kini nga gimbuhaton sa mga pulis gipasa na ngadto sa Philippine Drug Enforcement Agency kun PDEA. Kay wa nama’y Tokhang ang padayon nga pagsiaw sa negosyo sa iligal nga drugas mas mosamot pa. Nisiaw man gani sa panahon sa Tokhang karon pa kaha. Hinuon gipasalig sa taga PDEA nga  ilang gidawat  ang hagit pagpatuman sa kamanduan sa Presidente. Matod ni PDEA7 Regional Director Yogi Fernandez nga di angay nga magmalipayon ang mga durugista  taliwala ning maong kaugmaran sanglit ang kampanya magpadayon kauban ang mga sundalo nga mao na karon ang ilang kaabag. Hinuon wa niya isalikway nga sa gidaghanon  lupig gyud sila sa PNP mao nga ang ilang tutukan karon mao kining gitawag og mga high value target. Agi’g tubag sa akong pangutana siya niingon nga naa na nila ang listahan gikan sa PNP labot sa nahisgutang mga high value target. Pasabot mao ni ang mga durugista nga maka baligya og kinilo.

Apan matod ni Sr. Supt. Eric Noble, ang pangulo sa kapulisan sa lalawigan, nga di gihapon malikayan nga dunay mapatay ang kapulisan kung mosukol ang ilang dakponon. Ang gipasabot ni Noble kung sa pagpatuman sa balaod mangahas pagpakig engkwentro ang ilang subject mahitabo gihapon ang patay.  Ang sunod nga pangutana nga wa pa sa’y tubag ang mga patay nga giingong under investigation moundang ba sab?  

Recruit

Niadtong Miyerkules nanumpa ang subra sa 300 ka mga bag-ong recruit sa  pagka pulis. Ang maong gidaghanon mas minos sa 700 kapin nga maoy actual nga quota.  Ang akong nasayran  usa ka lahi nga matang sa module ang ipailaila sa PNP isip kabahin sa ilang training. Usa ka adlaw sa wa pa ang ilang oath taking ako na nga nahinabi ang pipila nila labot sa isyu sa pangurakot nga nakapatay-og sa ilang organisasyon. Si P01 Khacel Anne Sanchez nga taga Sibonga ug Lister Jay Bacalla nga taga Danao City nanubag sa akong mga pangutana labot sa maong isyu. Ilang gisaad nga  ilang panggaon ang maong propesyon ug ipatigbabaw kanunay ang mga mithi sa usa ka tinud-anay nga tinugyanan sa balaod. Way bahid sa pangurakot sa laktod nga pagka sulti.  Samtang si Joesue Colipano nga taga Catmon gusto nga ipatigbabaw kanunay ang mga pulong nga To Serve and Protect. Sa mga wa makaila si Colipano  nailhan ni sa pangalan nga DJ Magsoy sa nagtrabaho pa siya isip DJ sa MOR 97.1 Lupig Sila. Ang uban sama kang Colipano duna say  mga abilidad nga sa akong pagtoo dako kaayo ug matampo alang sa usa ka malamposon nga pamolis. Di man gud ni mahimo nga pulos  lang  liko sa kanan, liko sa kaliwa.