NAUNSA na man ning dalan Colon sa syudad sa Sugbo karon nga mora na man og nagkayamukat ang sitwasyon ilabi na og magabii.
Kon kaniadto hinayhinay na nga mibalik ang kahapsay sa maong dapit, human gipatuman sa miaging administrasyon ang paglimpiyo sa mga sidewalk, kini dako nang sukwahi karon.
Gawas sa mga nagdasok nga mga manindahay og barbeque, isdang sinugba, adobong manok ug baboy, prutas ug uban pa nga gani mikuha na og dakong pahat sa kalsada, nahimo na usab kini karong terminal sa mga habal-habal.
Walay pupanagana ug wala nay kahadlok ang mga habal-habal drivers nga magsigi og tadlas-tadlas sa Colon aron mangita og pasahero. Kini taliwala sa presensiya sa mga traffic personnel kinsa mora na lang sab og wala magpakabana. Makita usab ang mga nagpasad nga basura sa matag eskina nga hugaw nga tan-awon sanglit magpatuyang na man lang sab og panglabay ang mga manindahay sa mga biya sa ilang tinda. Tungod kay gidagsaan lagi sa mga tawo, wala usab magpauwahi ang mga dautang elemento sama sa mga mangunguot, mangingilad ug snatchers nga nangita lang og saktong binta nga makabiktima.
Maglisod na sab og agi ang mga tawo sa sidewalk kay aduna na usay mga lamesa nga gipangbutang nga gihimong kan-anan sa mga kustomer.
Unsa na man diay karon ang gihimo sa Prevention, Restoration, Orderly, and Enhancement (Probe) team? Kaniadto, ubos sa pagpangulo ni Raquel Arce-Bohol, aktibo kaayo ni, pero karon mora man og way nahimo.
Kon gitugot man gani ni, maayo sab siguro nga hapsayon nila kini pagpahimutang nga dili law-ay tan-awon ug di sab makadisturbo sa mga tawo.