SA miaging adlaw na headlines sa sports page nga si Usain Bolt sa Jamaica gikuhaan og gold medal sa relay nga lumba sa dagan sa niaging Olympics kay ang usa niya ka teammate nasakpan nga nigamit og prohibited drug.

Strikto kaayo ang IOC bahin niini. Pag-apply sa chess nga maapil sa Olympic games giklaro nila nga mosunod aning rule sa doping.

Sa Dresden Olympiad sa 2008 napildi si Vassily Ivanchuk ni Gata Kamsky ug pagkahuman ang usa ka arbiter misulti ni Ivanchuk nga siya ipa-drug test. Gisinggitan ni Ivanchuk ang arbiter. Gipatiran ang bongbong sa lobby ug gibunalan ang mga lamesa sa cafeteria ug nilakaw.

Bisag unsaon pagsulti niya nga mohatag og gamay nga sample sa iyang ihi wala gyud siya mosugot. Ang pagbalibad gihulagway nga positibo siya sa drugas ug ma-ban unta og duha ka tuig.

Ang mga chessplayers milaban ni Ivanchuk nga ang testing dakong insulto nila. Daghang miprotesta ani kay walay drugas nga makatabang sa chess. Ang Fide Hearing Panel ni desider nga dili siua ma-ban kay way klaro nga makatabang ang doping sa chess.

Niadto pa unta ning 1999 nga ni deklarar sa Fide nga mag drug testing sa mga major tournaments. Pero wala ni maimplementar kay hapit tanang player nisupak.

Karon naa na kunoy positive proof nga naay mga drugs nga makaumento sa dua.

Naay study nga gipublish sa European Neuropsychopharmacology, ang official publication sa European College of Neuropsychopharmacology, nga dunay mga drugas nga makaumento sa dinuwaan, mga 13 ngadto sa 15 percent . Ang duha ka prescription drugs, methylphenidate, nga stimulant sa central nervous system para sa treatment sa attention deficit disorder (ADD) ug attention deficit hyperactivity disorder (ADHD), ug modafinil, para sleep disorder ug gani hasta ang caffeine.

Dakong problema ni sa Fide kay tungod dali rani mapalit ug wala pay dope testing karon nga makadetect aning mga tambala. Kadaghanan sab sa nasud puwede ni mapalit over the counter.

Sa study nga giresearched sa 13 ka professors sa lainlain German Universities ug University of Stockholm, 39 ka male chess players gipainom og 2×200 mg modafinil, 2×20 mg methylphenidate ug 2×200 mg caffeine ug miduwa sa chess computer Fritz 12.

Ang resulta kay ni umento 15% sa modafinil ug 13% sa methylphenidate ug 9 % sa caffeine ang ilang abilidad.

Dili jud ko motuo aning ilang findings. Kung tinuod ni nga ma bright ka kusog unta ni mahalin sa una pa. Kanang moumento ka tungod sa kape way klaro! (boypestano@gmail.com, www.chessmoso.blogspot.com)