Demecillo moaway sa WBO bantam title

SAGUBANGON ni Ken­ny Demecillo sa Omega boxing stable ang iyang labing lisod nga pagsuway karong Marso 11 sa Hong Kong Convention and Exhibition Center.

Si Demecillo, 24, ma­kigbatok sa kababayang si Mark Anthony Geraldo alang sa inilugay sa bakanteng World Boxing Organization (WBO) Oriental bantamweight title.

Nahilakip kini sa undercard sa away nila ni Rex Tso batok Hirofumi Mukai.

Kon kasinatian ang hisgutan, layo ra si De­me­cillo sa 25 anyos nga si Geraldo.

Si Demecillo, kinsa lumad nga taga Iligan City, naggunit pa lang og 12-3-2, 7KOs nga rekord samtang si Geraldo, kinsa lumad nga taga Valencia, Bukidnon, adunay 33-7-3, 15KOs nga baraha.

Si Geraldo maoy bugtong boksidor nga nakalupig sa kasamtangang In­ternational Boxing Fe­deration (IBF) super flyweight champion Jerwin Ancajas.

Ang Demecillo-Geraldo bout usa lang sa tulo ka events nga giatangan sa Omega Pro Sports International (OPSI) sa buwan sa Marso.

Ang laing Omega fighter nga si Jason Canoy moaway karong Marso 31 sa South Africa alang sa World Boxing Federation (WBF) bantamweight title fight samtang ipahigayon sab sa OPSI ang Who’s Next 4 boxing promotion sa samang buwan.

“We at OPSI are excited with the recent developments for our boxing program with this break for Kenny, Jason Canoy fighting for the WBF bantamweight championship in South Africa on March 31, and the staging of Who’s Next? 4, all of these in March. But we aren’t taking Geraldo lightly. He’s a veteran with a lot of experience,” pamahayag ni OPSI president Pio Paulo Castillo nga gipadangat sa email.