NAGKUMBOYA og 76 puntos ang gikahadlukang trayanggulo nila ni Stephen Curry, Kevin Durant ug Klay Thompson aron agakon ang Golden State Warriors batok sa host Los Angeles Lakers, 133-120, kagahapon sa National Basketball Association (NBA).
Si Curry, back-to-back MVP, nagpakatap og 29 puntos ug 11 assists, nidugang og 26 puntos ug 10 assists si Durant samtang niamot og 21 puntos si Thompson.
Ang Warriors, nga ningkombati nga wala si Draymond Green, mingsaka sa 43-7 nga rekord samtang ang Clippers natagak sa 31-19 nga rekord.
Gisugdan sa Warriors ang 4th quarter pinaagi sa 9-5 run nga nagposte sa ilang labing dakong labaw nga miabot og 21 puntos.
Ning-aksyon paggukod ang Clippers sa hinapos nga bahin apan wala ra giahpon sila nakasugakod.
Ang Clippers, nga ningkombati nga wala sab ilang pambatong guard nga si Chris Paul, gipangulohan ni Blake Griffin pinaagi sa iyang season-high 31 puntos samtang nidugang og 21 puntos si Jamal Crawford.
Spurs 102, 76ers 86
GIPANGLAMPORNAS sa host San Antonio Spurs ang Philadelphie 76ers.
Ning sangkaa, si Spurs coach Gregg Popovich nakatabla sa rekord sa labing daghang kadaugan nga naangkon sa usa ka coach sa usa lang ka team.
Kini maoy ika-1,127 nga kadaugan ni Popovich sukad sa iyang paggiya sa Spurs.
Nakatabla si Popovich kang coach Jerry Sloan sa Utah Jazz.
Hawks 113, Rockets 108
NIPUPO og 24 puntos si Dwight Howard aron tabangan ang Atlanta Hawks nga modaog batok sa iyang kanhi team nga host Houston Rockets.
Kini maoy labing unang duwa ni Howard sa balwarte sa Rockets gikan sa iyang pagbalhin sa Hawks sa offseason.
Gipangulohan ni Tim Hardaway Jr. ang Hawks pinaagi sa iyang 33 puntos.
Nasugakod sa Hawks ang kabangis nga gipakita sa pambato sa Rockets nga si James Harden, kinsa nagpauwan og 41 puntos.
Wizards 116, Lakers 108
Nimugna og 33 puntos si John Wall samtang niamot og 23 puntos si Bradley Beal aron pangulohan ang kadaugan sa host Washington Wizards batok sa Los Angeles Lakers.
Kini maoy labing unang higayon nga nakaabot og unom ka sunodsunod nga kadaugan ang Wizards gikan niadtong Disyembre 8-19, 2014.
Mao sab kini ang ika-16 nga kadaugan sa Wizards sulod sa ilang korte, ikaduhang labing taas sa kasaysayan sa NBA. AP/ESL