ORMOC CITY, Leyte - Bisan sa anunsyo ni Police Director General Ronald ‘Bato’ Dela Rosa nga temporaryong hunongon ang war on drugs, ang ubang mga pulis mobarog sa ilang trabaho isip tigpatuman sa balaud.

Matod sa usa ka opisyal sa Ormoc City Police Office (OCPO), ang anunsyo wa nagpasabot nga di na sila pwede manakop bisan og makit-an sa akto ang pagbuhat og kalapasan sa Dangerous Drugs Act.

“Asa naman lang among pagkapulis kun di mi manakop, manakop gihapon mi,” pasabot sa opisyal.

Ang pamahayag migawas gumikan sa kabalaka sa ubang lumulupyo nga basin og mokuyanap pagbalik ang ilegal nga drugas.

Matod ni Ramil, nagpuyo ning dakbayan, nakadayeg siya karon sa iyang ig-agaw gumikan kay nakatutok na kini sa ilang negusyong pagpaninda og sud-an uban sa iyang asawa ug mibalik na sa orihinal nga porma ang lawas gikan sa kadaot gumikan sa paggamit kaniadto og ilegal nga drugas.

Apan nabalaka siya kay basin og mobalik na usab ang ilegal nga negusyo ug mobalik usab sa paggamit ang iyang ig-agaw.

Alang sa kapulisan, di kini angay kabalak-an kay bisan og temporaryong gihunong ang mga anti-illgeal drug ope­rations pinangulohan sa kapulisan apan padayun ilang pag-monitor sa lugar ug i-coordinate kini sa Philippine Drug Enforcement Agency (PDEA) nga mao karon ang gitahasan nga mopadayun sa war on drugs.