TAGBILARAN City - Masulob-on ug inusara nga iselebrar sa usa ka Amerkano ang umaabot nga Valentines Day gumikan sa pagkapatay sa iyang Pinay nga uyab dihang aksidente nga nabanggaan sa Southern Star Bus (Ceres Bus) ang gisakyan nga motor sa manag-uyab didto sa Sitio Bantol, Barangay Dampas, siyudad sa Tagbilaran niadtong Martes sa gabii.
Dead on arrival (DOA) ang Pinay nga biktima nga si Rose Perez, 32, ug tempraryong nagpuyo sa may St. Joseph Village, Barangay Cogon, siyudad sa Tagbilaran.
Samtang nakaangkon og angol sa lawas nng langyaw nga si Mark Ellers Wilkins, 67, lumad nga taga California, Estados Unidos ug uban nga nagpuyo sa iyang uyab.
Sa pakisusi sa kapulisan nga gipangulohan ni PO1 Mayjurricko Arawiran, nasayran nga nagsakay ang mag-uyab sa usa ka motor nga gimaneho sa lalaki padung ngadto sa Baragay Bool diin nagsunod usab kanila ang Ceres Bus nga gimanehoan sa giila nga si Luciano Tiu Jr., 45,minyo ug residente sa Barangay Poblacion, lungsod sa Anda.
Sa pag-abot sa lugar nga nahitaboan, nabantayan nalang sa drayber sa Southern Star Bus nga adunay nipaka ug wa mabantayi ang motorsiklo sa manag-uyab nga aksidenteng nabanggaan.
Basi sa mga saksi sa insidente nag-ingon nga kalit lang nga ni-overtake ang bus nga gimanehoan ni Tiu ug giingon nga nasaghiran ang motorsiklo nga gisakyan sa manag-uyab.
Gidudahan usab nga nalatayan ang biktima sa luyo nga ligid sa bus.
DOA ang biktima nga Pinay dihang gidala kini sa Gov. Celestino Gallares Memorial Hospital sa dakbayan sa Tagbilaran.
Samtang ang Amerkano anaa nagpaalim sa mga angol nga naangkon sa samang tambalanan.
Boluntaryo usab nga ni-surrender ang drayber sa bus ngadto sa kapulisan sa dakbayan sa Tagbilaran human sa insidente.
Sa pakighinabi sa programang ‘’Inyong Alagad’’ sa dyRD kang German Avinedo, manager sa Southern Star Bus, nagkanayon kini nga ilang tatakon ang drayber.