Pag-jam sa cellphone signal sa prisuhan sa Mandaue suportado

NIPADAYAG og pagsuporta si Mandaue City Mayor Luigi Quisumbing sa proposal ni City Jail Warden Supt. Renante Rubio nga i-jam ang signal sa cellphone sud sa bilangguan aron kalikayan ang aktibidad nga may kalambigtan sa drugas.

Atol sa City Anti-Drug Abuse Council meeting, si Rubio nangutana kon adunay kahimanan ang dakbayan nga mowagtang sa signal sa prisuhan sanglit padayon man ang ilegal nga aktibidad sa pasilidad bisan sa subsub nga kampanya batok drugas.

Matod ni Mayor Qui­sumbing nga mopalit ang dakbayan ug jamming unit karong tuiga.

Kahinumduman nga sa milabayng tuig ang Bureau of Jail Management and Penology-7, Philippine Drug Enforcement Agency-7 ug Mandaue City Police Office nihimo ug inspeksyon sa prisuhan apan way nakitang iligal nga drugas ang aw­torid gawas sa paraphernalia, mahait nga hinagiban ug duha ka cellphone.

Sa 1,366 ka mga pi­niriso sa city jail, 800 niini ang napriso tungod sa ilegal nga drugas.

Nagtuo si Quisum­bing nga bisan way nakuhang drugas sud sa prisuhan sa raid, haum nga butangan og signal jammer ang pasilidad.

Dugang niya nga ma­wagtang unya ang ilegal nga pagpalusot sa drugas sud sa prisuhan kon mawagtang ang phone signal human kini ang sagad gamiton sa mga transaksyon.

Paambit sa mayor nga bisan adunay signal jammer, di kini makaapekto sa mga kawani sa BJMP tungod sa handheld radio ang gigamit niini.

Sa laing bahin, gibutyag ni Quisumbing nga angayan na nga pa­lapdan ang city jail tu­ngod sa kadaghan na sa binilanggo.

Related Stories

No stories found.
SunStar Publishing Inc.
www.sunstar.com.ph