KANHI giisip nga badlungon sa katilingban si Lloyd nga nalambigit sa lainlaing mga krimen ug nagumon usab sa ginadili nga drugas kaniadto.
Nag-edad pa lang siya og 11-anyos dihang nagsugod na og pangawat ug pagpanulis gumikan sa impluwensiya sa iyang mga barkada.
Ang dautan nga mga buhat nagpadayon hangtod nag-edad siya og 14-anyos diin magsulod ug gawas na siya sa prisohan tungod kay menor-de-edad.
Dihay higayon, matod niya, nadakpan siya sa mga pulis ug giingong gi-torture sila sa iyang mga kauban diin gipaluhod sila samtang gibunalan og batuta sud sa usa ka police station sa dakbayan sa Sugbo.
“Naka-experience ko og kasakit, ingon ani diay ni sila. Nakaingon ko mao na seguro ni ang dan akong tahakon. Sa akong kaugalingon nakaingon gyud ko dili nako mausab,” pamulong ni Lloyd atol sa forum nga gipasiugdahan sa mga grupo nga supak nga usbon ang minimum age sa criminal responsibility sa mga menor-de-edad nga malambigit og krimen, niadtong Huwebes sa social hall sa Kapitolyo.
Si Lloyd niangkon nga kuwang siya og pagtagad ug pagmahal sa iyang inahan. Nagdako usab siya nga wa makaila ug makakita sa iyang amahan.
Apan, ang kanhi usa sa mga children in conflict with the law (CICL) sa Sugbo, nausab dihang naluwas ug gidala sa Magone Home sa Don Bosco Boys’ Home and Training Center sa Barangay Cotcot, lungsod sa Liloan.
Sa pacilidad daghan siya og nakat-onan, diin matag adlaw manimba sila ug kini naghatod niya sa kausaban sa kinabuhi.
Niadtong Abril 2015, nakatapos si Lloyd sa pag-eskwela sa Alternative Learning System (ALS) sa tabang sa nagpakabana nga grupo.
Karon, eskolar na siya sa usa ka unibersidad sa dakbayan sa Sugbo sa kursong Psychology.
Si Lloyd, 18, nipili sa maong kurso tungod kay ganahan siya motabang sa kabataan nga nakahimo og salaod sama niya kaniadto.
Siya, uban sa nagkadaiyang grupo nga naglantaw sa kaugmaon ug katungod sa kabataan, ningsupak nga usosan ang edad sa mga menor-de-edad nga dunay tulubagon sa krimen.
Apil na niini ang Philippine Legislators’ Committee on Population and Development Foundation, Inc., lead convenor; Child Rights Network, Children’s Legal Bureau Inc. ug uban pa.
Ilang gihingusgan ug gipalapdan ang pagsupak batok sa unom ka balaudnon nga nag-ung-ong sa Ubos Balay Balauranan nga nagtinguha maamendahan ang Republic Act 9344 Juvenile Justice and Welfare Act of 2006 nga ikanaog sa 9-anyos gikan sa 15-anyos, ang minimum age of criminal responsibility sa menor-de-edad nga nalambigit og krimen.
“Dili ta angay mo-judge bisan unsa pa na sila (CICL) kabati, unsa pa kabuak ang ilang ugma...” pamulong ni Lloyd.
Si Atty. Noemi Abarientos, program coordinator sa Children’s Legal Bureau, niingon ang pagpakunhod sa edad sa mga bata nga nakahimo og krimen dili maminosan kon dili madakpan ug mapanubag ang mga hamtong nga naggamit sa kabataan pagbuhat og salaod.
Atol sa forum, si Lilybeth Gallego, pangu sa National Coordination, Monitoring and Information Management Division sa Juvenile Justice and Welfare Council, niingon nga 38 lang ka Bahay Pag-Asa Facilities ang natukod sa nasod ug tungod sa kakuwangan, ang CICL nga dili mahiuli sa ilang tagsatagsa ka mga pamilya ug mga komunidad ang itanggong sa mga prisohan.
Sa 2016, matod niya, sa 319 ka mga bilanggoan nga gidumala sa Bureau of Jail Management and Penology nga ilang nainspeksyon, nakaplagan nila ang 397 ka mga bata nga gitanggong ug 109 niini ang nabuhian ug gibalhin sa mga pasilidad o ilang mga ginikanan.