GIKAN sa usa ka pwesto nila sa may Lanang ning dakbayan sa Davao, nanggamot ug milanit pa sa ubang bahin ning dakbayan ug sa kauluhan ang Blue Post Boiling Crabs and Shrimps!
Bag-uhay lamang gibuksan na sab nila ang ika-tulo nilang branch dinhi sa Davao diha sa SM City Annex sa Ecoland.
Usa ka home-grown Davao brand, tuod man padayon sa paglambo ang kompanya, inubanan sa pagsilbi sa lamiang pagkaon nga katakam-takam.
Klik sa mga customers ang kinamot style nga pagkaon nimo inubanan pa ang feel-at-home ambiance sa ilang pwesto.
“The target is to end up with up to eight restaurants by end of the year,” suma pa ni AA Group of Companies Chief Executive Officer Anthony Ang atol sa opisyal nga pagbukas sa ika-tulo ug pinadakong branch diha sa SM Annex.
Gipaniguro sab ni Ang nga export quality ang mga alimango nga ginasilbi nila nga gikan pa sa Zamboanga ug Surigao.
Apan tungod sa nagnihit nga produksiyon nangangkat sab sila og alimango sa Samar ug Bulacan.
Pagtabang sa mananagat
Gidugang ni Ang nga mitabang sab sila sa mga crab farmers sa pag-finance aron masiguro nga sila mahatagan sa maayong suplay ug klase sa alimango.
“We give them the initial capital and then when harvest time comes we buy all the crabs from them.”
Giayudahan nila ang mga mananagat sa Surigao ug Zamboanga.
Ekspansiyon
Luyo sa Davao City, suwayan sa kompanya ang pagpalambo pa sa ilang negusyo sa Visayas ug Luzon.
Sa kasamtangan may lima na sila ka branches, ang tulo sa Davao City (J.P. Laurel Avenue, Lanang Biz Park ug SM City- Annex) samtang may duha sa Manila (SM North Edsa ug SM Mall of Asia).
Dugang pa nga sa di pa matapos ang tuig, laing tulo ka branch pa ang ilusad didto sa O-Square Greenhills Shopping Center, Seascape Manila ug SM Megamall.