MITAAS ang employment rate sa tibuok Davao Region og 1.3 porsiyento ngadto sa 1.993 million (95.5 porsiyento) employed individuals natala sa rehiyon sa 2016 gikan sa 1.924 million (94.2 porsiyento) sa 2015.
Si National Economic and Development Authority Regional Director Maria Lourdes Lim nagbutyag atol sa Kapehan sa PIA niadtong Biyernes, Pebrero 3, nga ang pagtaas puwedeng tungod sa pagtubo sa “market confidence” nga miresulta og trabaho sa 2016.
Dugang pa niya nga ang election campaign period sa milabay nga tuig, mipatukpaw pa sa ihap sa election-related jobs ug mga negusyo naglakip sa pag-imprinta ug advertising ug uban pa.
Matud niya nga ang pagdaghan sa trabaho tungod sab sa mga programa nga gilusad sa Public Employment Service Office ubos sa Department of Labor and Employment, Local Government Units, ug sa mga pribadong sektor.
Sa pagtaas sa employment rate sa rehiyon, mikubos sab og 2.3 porsiyento sa underemployment rate.
Gikan sa 19 porsiyento nga underemployment niadtong 2015, ang ihap mihagba ngato sa 16.7 porsiyento sukad sa milabay nga tuig.
Nalabwan sab niini ang national average underemployment rate sa 20.7 porsiyento.
Apan ang ihap mas duol na ngadto sa Davao Region target og 15 porsiyento.
Puno pa ni Lim, ang paningkamot nga makubsan pa og maayo ang underemployment sa rehiyon, ang Dole nagprayoridad sa mga programa nga maglig-on sa “linkage” tali sa academe ug sa industriya nga ma-align ang curricula uban sa demand sa industriya sa Davao Region.