TACURONG CITY -- Naningkamot karon si Sultan Kudarat Governor Pax Mangudadatu nga mabuhian ang duha ka sundalo nga gidagit sa New Poeple's Army (NPA) alas 7:45 sa buntag niadtong Huwebes, Pebrero 2.

Giila ang mga biktima nga sila Sergeant Solaiman Calocop ug Private First Class Samuel Garay, mga sakop sa 39th Infantry Battalion sa Philippine Army.

Matud ni Regional Police Office-Soccsksargen spokesperson Romeo Galgo nga giatngan og gibanabana 20 ka mga rebeldeng NPA ang duha ka sundalo samtang sakay sa usa ka motorsiklo nga gimaneho ni Garay paingon sa ilang detachment sa Barangay Telefas, Columbio, Sultan Kudarat.

Gipugos ang duha ka sundalo sa pagdala padulong sa bukiron nga bahin sa utlanan sa Columbio ug sa probinsiya sa Davao del Sur.

Mga rebeldeng giingong mga sakop sa Front Committee 72 sa NPA.

Abtik nga nagresponde ang mga sakop sa 39th Infantry Battalion uban ang mga sakop sa kapulisan ug sa Citizen Armed Forces Geographical Unit apan wala na nila maabtan ang mga rebelde gawas lamang sa motorsiklo nga gisakyan sa mga biktima.

Nahitabo ang pagdagit sa duha ka sundalo pipila ka oras ang milabay sa diha nga gitapos sa mga NPA ang unilateral ceasefire ngadto sa gobyerno.

Hangtud sa pagkakaron, wala pay gipagawas nga pamahayag ang Front Committee 72 sa ilang pagdagit sa duha ka sakop sa 39th Infantry Battalion.

Samtang giklaro ni 39th Infantry Battalion Commander Harold Argamoza nga walay armas ang duha ka sundalo gumikan anaa sila sa Peace Development and Outreach Program sa Columbio.