NAGBUTYAG ang Mines and Geosciences Bureau (MGB)-Davao Region nga nakadiskobre sila og 135 ka mga sinkholes (mga lungag ilawom sa yuta) sa Island Garden City of Samal, probinsya sa Davao del Norte.

Si MGB Regional Director Wilfredo Moncano nagbutyag nga ang pagkadiskobre nasuta pinaagi sa ground penetrating radar.

“Samal ang atong priority kay limestone formation ang bato diha nga prone sa sinkholes,” sulti ni Moncano nga nahinabi sa SunStar Davao SuperBalita niadtong Biyernes, Pebrero 3.

Migula sa pagtuon sa MGB nga ang mga sinkholes sa isla, ilang nadiskobre nga anaa sa 50 metros gikan sa ibabaw sa yuta.

“Naay gidak-on nga usa ug tunga sa dupa, naa say unom ka metros ang gidak-on sa sinkholes,” ingon sa opisyal.

Hinuon, gipasabot sa opisyal nga bisan daghan ug dagko ang mga sinkholes nga ilang nadiskobre, di angay mabalaka ang katawhan nga maunlod ang isla.

Suma ni Moncano nga di tumong nila ang paghadlok sa katawhan sanglit buot lamang nilang masayud ang katawhan nga magtukod og gambalay sa isla.

“Information lang kini alang sa mga maghimo og mga buildings aron maapil sa ilang plano kung asa ang luwas,” pasabot ni Moncano.

Giawhag sab niya ang katawhan sa dapit nga kung dunay makita nga mga sinkholes, ipahibalo dayon sa ilang mga opisyales sa barangay aron mapaabot sa buhatan sa MGB.

Tungod sa nakitang sinkholes, nakigkoordinar na sa lokal nga gobyerno ang mga dagkong kompanya nga nagtukod og gambalay sa Samal nga nailang nindot nga tourist destination sa Davao Region.