NAKAANGKON ug samad sa dagway ang usa ka lalaki human nga gipusil sa kaugalingong ugangan niadtong Huwebes, Pebrero 2, diha sa Zone 8, Pualas, Baungon, Bukidnon.
Nagpaalim pa sa Northern Mindanao Medical Center (NMMC) sa Cagayan de Oro ang biktima nga nailang si Harold Reyes, 32, minyo ug lumulupyo sa nahisgutang dapit.
Sa impormasyon nga nahipos sa NMMC, nasayran nga aduna na’y pagdumot ngadto sa biktima ang iyang kaugalingon nga ugangan sa wala na usab ikabutyag nga hinungdan.
Giingong atol sa maong hitabo posibleng wala na kini makapugong ug kalit lamang nga gipusil ang biktima gamit ang wala ikabutyag nga klase sa armas diha mismo sa dagway niini.
Wala usab masayod ang asawa ni Reyes kung unsa ang nakapasuko sa iyang amahan nga miresulta kini sa maong pagpamusil.
Sa pagkakaron, ang maong biktima ang pabilin pa nga nagpaalim sulod sa NMMC.