20 kapin ka motorsiklo gi-impound

MOABOT sa 20 kapin ka mga motorsiklo ang gi-impound sa kapolisan ug mga traffic enforcers atol sa ilang gihimong random mobile checkpoint niadtong Huwebes sa gabii, Pebrero 2, diha sa dalan Velez Street, dakbayan sa Cagayan de Oro.

Ang pagpangdakop og mga motorsiklo gihimo sa Regional Public Safety Battalion-Northern Mindanao ug mga personahe sa Roads and Traffic Administration.

Gibutyag ni Police Senior Inspector Rogie Ortencio gikan sa RPSB nga walay pili ang ilang gipara nga mga motorsiklo ug kadtong adunay mga kasupakan ang ilang giisyuhan og traffic citation ticket.

Lakip sa mga kalapasan nga nababagan mao ang mga motorsiklo nga walay rehistro, expired ang rehistro, walay plate number, walay helmet ug ingon man walay driver’s license ang nagmaneho.

Gipara sab nila ang mga pribadong sakyanan alang sa visual check ug tumong niini makigbatok sa mga kriminalidad nga matigayon.

Dugang ni Ortencio nga kanunay na nila kining himoun tungod kay dako ang ilang pagduda nga mas daghan pa ang ilang madakpan nga adunay susama niini nga mga kasupakan.