3 sundalo gihulagway nga overkilled

OVERKILLED ang paghulagway sa kasundalohan sa kamatayon sa ilang tulo ka mga kauban didto sa Barangay Kibalabag, dakbayan sa Malaybalay, Bukidnon.

Gibutyag ni Philippine Army 4th Infantry Division spokesperson Joe Patrick Martinez nga “overkilled” ang mga sundalong namatay ug imposible kaayo nga misukol susama sa pamahayag sa kampo sa New People’s Army (NPA).

Moabot ngadto sa 20 kapin ka mga samad pinusilan ang naangkon sa tagsa-tagsa ka mga biktima.

Giingong vulnerable ang ilang mga sakop ug walay ikasukol apan gitabangan gayud kini og pusil sa pila ka mga armado.

Gikwestyon usab ni Martinez ang pamahayag sa NPA nga pag-atras sa unilateral ceasefire gumikan kay Pebrero 10 paman kini moepekto.

“Wala pa gani ang gikatakda nga petsa daghan naman nga atake ilang gihimo,” butyag ni Martinez ug midugang nga dayag lamang nga gilinla lamang nila ang katawhan sa pamahayag apan ang pagpangatake padayon.

Sa pagkakaron, padayon ang hot pursuit operation nga gihimo sa kasundalohan ug kapolisan ngadto sa mga armadong grupo.

Si Malaybalay City Police Station Chief Alfredo Ortiz nibutyag nga pagkakuha sa patay’ng lawas, anaa pa ang kantidad nga P22 mil sa kamot sa mga sundalo sukwahi sa unang pamahayag nga gikilkilan kini.

Kahinumduman ang maong mga sundalo sakop sa Bayanihan team sa 8th Infantry Battalion ug gibutyag sa ilang tigpamaba nga si Captain Norman Tagros nga miadto sa sentro nga bahin aron mag follow-up sa livelihood projects lakip na ang pagkuha sa ilang cash allowance.

Apan nahitabo ang pagpangatake pagbalik na sa tulo ka mga sundalo ngadto sa Barangay Kibalabag.

Miangkon

Nagpadala og pamahayag ang kampo sa New People’s Army (NPA) pinaagi sa ilang tigpamaba nga si Jorge Madlos, alyas Ka Oris, nga sila ang responsable sa pagpangatake sa tulo ka mga sundalo.

Ilang rason nga napugos silang pusilon ang tulo tungod kay samtang sakay sa ilang motorsiklo ang tulo ka mga sundalo dihang nakita ang presensya sa mga armado unang mihulbot og armas aron unta mamusil hinungdan nga daw giunhan na nila kini og pusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph