BINASI sa Isaias 58:7-10; Salmo 112: 4-9; 1 Corinto 2:1-5; ug Mateo 5:13-16.
Ang akong iyaan nga Bisaya kaayong dako mangahas pagkulukabildo sa iyang mga kailang Tagalog pinaagi sa duha lamang ka pulong: “talaga” ug “pambihira.” Moyangoyango lang kini siya ug magpunay lang og litok sa “talaga” samtang ang iyang kauban nag-istorya. Usahay, panagsaan pod niya kini og “pambihira.”
Nahinumdum ko niini tungod kay sagad sa mga batan-on karon “as in” na lang dayon ang idugang sa istorya kon mahutdan na sila og ikasulti o, dili ba kaha, kon buot nilang hatagan og gibug-aton ang ilang gisulti.
Gihatagan ni Jesus og gibug-aton ang ilhanan sa usa ka Kristyano: “Kamo ang asin sa kalibutan… Kamo ang kahayag sa kalibutan.” Kon karon pa kini: “As in asin ug kahayag.” “As in” gayod kay kon wagtangon kining duha ka mga butang, mawagtang usab ang kinabuhi sa kalibutan.
Ang asin, pananglit, maoy gamiton sa paghatag og lami sa pagkaon ug igpatunhay niini. Gani ang pulong salary gikan sa pinulungang asin (salt). Naandan kaniadto nga imbis salapi ang isuhol sa tawo, asin ang ihatag. Asin man gud ang isagol sa pagkaon o karne aron motunhay kini sa mga lugar nga bugnaw sa panahon nga dili mahimong mag-uma. Maghatag usab og lami ang asin; walay lami ang tab-ang nga pagkaon.
Apan mapuslanon lamang ang asin ug kahayag kon makapaambit kini sa ilang hiyas ngadto sa hingtungdan. Kon mawad-an og kaparat ang asin, wala na kini kapuslanan. Kon ang gidagkutang tukaro tabunan, mawalay bili kini.
Nawad-an og kaparat ang Operation Tokhang sa kapulisan kay nakita nga nasagulan kini og lain tinguha. Gigamit lang ang Tokhang aron matabunan ang ngil-ad nga tumong sama sa pagpangidnap ug pagduso pa og ubang kriminal nga buhat. Di man hinuon tanan ug, sa akong panahom, dili ang kadaghanan sa mga pulis. Apan ang pipila makadaot sa kadaghanan. Ang maayong tumong sa Tokhang nasagulan sa kangitngit.
Hinloan usa sa kapulisan ang ilang pundok ug hunongon usa nila ang ilang “War Against Drugs” aron mangayog lamdag gikan sa Dios nga Makagagahom. Maayong paminawon ang tingog ni propeta Isaias nga nagkanayon nga ang Dios moingon og “Ania ako!” inigtawag nato Niya kon wagtangon usa nato ang pagpanlupig ug pakan-on nato ang mga gigutom. Makaguol baya nga ang “War Against Drugs” sagad mapatay mga kabos.
Dili pasikatay ang gikinahanglan sa kapulisan kay sa pulong pa ni San Pablo sa iyang sulat ngadto sa mga taga Corinto: “Mianhi ako kaninyo diha sa kahuyang ug kahadlok…ug ang akong mensahe… dili inubanan sa makadani nga mga pulong sa kinaadman, apan pinaagi sa pagpahayag sa Espirito ug gahom.” Ang pagdawat sa kaugalingong kakulangan aron mahatagan og luna ang gahom sa Dios timailhan sa kahayag nga midan-aw kanato.
Sa ato pa, isip kapulisan ug isip usa ka nasod, kinahanglan kita modawat sa atong mga kahuyang aron mahimo kitang asin ug kahayag. Maayo nga midawat ang PNP ug ang pangagamhanan sa ilang mga kakulangan. Diri magsugod ang tinuoray nga kabag-ohan.
Apan kinahanglan likayan sa gobyerno ang mga “short-cuts” as in pagpabalik sa “capital punishment” kay kini dili gyod makapakunhod sa krimen ug mga kabos lang gihapon ang mabiktima niini. Mora kunohay nig makapahadlok sa mga kriminal apan “short term” ra kaayo ni ug di gyod solusyon. Binasi ning akong panahom sa mga daghan na kaayong pagtuon mahitungod sa “death penalty.”
Ang pagka-asin ug pagkakahayag magsugod sa atong pag-aninaw ug paghimo sa kabubut-on sa Dios. Batid ang Simbahan mahitungod sa kinaiya sa tawo ug sa pag-ugmad og sibilisasyon sa gugma.
As in kapin na sa duha ka libo ka tuig ang edad sa Simbahan. Nag-agi na kinig daghan kaayong mga hagit gikan sa mga gamhanang tawo, apan gabarog lang gihapon. Ug bisan gani ang mga kahuyang ug ang mga sala sa mga miyembro sa Simbahan wala makapatumpag niini.