DAW walay undang ang kampanya batok sa ginadi­ling drugas dinhi sa Syudad sa Sugbo bisan pa man og ang kapulisan nihunong sa ilang gubat batok sa drugas tungod sa mga scalawag nga naa sa ilang han-ay.

Sa miaging Sabado, nadakpan ang magtiayong Abellana, giingong high value targets, nga diha naglumlom sa Barangay Basak-San Nicolas.

Gironda sab dayon ang usa ka drug den nga naa ra sa luyo sa Barangay Hall sa Carreta.

Kini nahitabo samtang nag­padayon ang kontrobersiya sa Barangay Ermita diin gisuspenso si Barangay Kapitan Imok Rupinta ug pito ka mga barangay konsehal.

Sa pagkakaron, gitudlo ni Mayor Tomas Osmeña si Konsehal Dave Tumulak isip caretaker sa Ermita samtang serbisyohan ni Kap Rupinta ang unom ka bulan nga suspensyon.

Dino

Nakainteres sa publiko ang pagtug-an ni Rupinta nga human gibutyag sa mayor ang iyang unang tulo ka rekomendasyon, nanawag kaniya si Presidential Assistant for Visayas Mike Dino ug nangayo og duha ka ngalan.

Nahibulong lang gyud ko nganong ni-enter si Dino ug ang opisyal nga nasuspenso, mao pa gyud ang gipangayuan og ngalan. Gibutyag kini ni Rupinta sa interbyu sa Sun.Star Cebu sa miaging Sabado.

Tingale kay nakaamgo ang kampo ni Dino nga makadaot kini kaniya, kalit nga nausab ang ilang mga gipamulong. Wa gi-confirm niya ang pamahayag ni Rupinta. Gani, gihimakak kini. Si Rupinta sab nausab ang pamahayag.

Apan wala palabya ni Ma­yor Osmeña ang pagtumaw sa ngalan ni Dino sa maong kontrobersiya. Iyang gibutyag ang plano nga mokiha og “obstruction of justice.”

Nitubag sab ang kampo ni Dino sa hulga nga mokiha og “defamation” kun pagdaot sa ngalan sa presidential assistant.

Gaan?

Dunay mga panahom nga parehong gaan ang mga planong kiha sa duha ka opisyal. Apan alang kanako, di kump­yansahan ang pagpangayo og mga pangalan gikan kang Rupinta kay moguwa man gud nga gisubmarino niini ang ka­tuyoan sa suspensyon.

Defamation? Ambot kon nakasabot ba si Dino nga kining ingon niini nga mga isyu tipik kini sa iyang gisudlan. Iya kining atubangon ug tubagon. Dili likayan.

Unta, ang katungdanan nga presidential assistant for Visayas di man manghilabot sa politika ug kining kampanya batok sa drugas dinhi sa Syudad sa Sugbo.

Kadtong mga presidential assistant sa miaging katuigan sama nilang Rhett Pelaez ug Felix Guanzon mo-coordinate man sa nahitungdang mga mayor.

Kini si Dino adto man mo­da­pig sa kaatbang ni Mayor Osmeña.

Kapitan

Akong pangagpas karon nga magpadayon ang pagsusi nga­nong di man makabantay ang pipila ka mga kapitan sa pagkatap sa gidiling drugas sa ilang mga barangay.

Pananglitan, banga-a na gyud sa kapitan nga wala maka­pa­hunong sa usa ka drug den nga naa sa luyo sa barangay hall. Moingon ko nga banga kay wa man koy ebidensiya nga mama­sangil nga komplut o protector.

Bisan pa man, angayan ki­ning imbestigahon kay posible gyud ang narcopolitics.

Mahimuot ko sa depensa nga pamulitika kay halos kining mga barangay kapitan diin kusog ang gidiling drugas sakop man sa Team Rama ug ang lider nila ginganlan baya ni Presidente Duterte nga drug protector.

Ug angayan tingaleng pa­naminan ni Presidential Assistant Dino nga di maayo kining madudahan siyang modupa sa mga tawo nga malambigit niining maong negusyo kay kontra baya ni Presidente Duterte ang gidiling drugas.

(@anol_cebu sa Twitter)