LIBRE nga dental service ang mapahimuslan sa 3,000 ka mga indibidwal atol sa ipahigayon nga dental mission sa Philippine Dental Association (PDA) inubanan sa Japanese dentists sunod semana.

Lakip sa maong libre nga serbisyo ang 100 ka pustiso diin madawat kini sa mga pili nga benepisyaryo.

Matod ni Dr. Felix Asoy, ang bise-presidente sa PDA– Cebu Chapter nga kini ang ikaduhang tuig nga himuon nila ang dental mission sa San Nicolas Elementary School sa dan Carlock, dakbayan sa Sugbo.

Inubanan sa 60 ka dentista nga base sa Sugbo ang laing 60 ka mga Hapon nga dentista diin magtinabangay sa paglimpyo, ibot ug pasta sa mga ngipon.

Duha ka adlaw ang maong aktibidad nga himuon karong Pebrero 9 ug 10 nga magsugod sa alas 8:00 sa buntag hangtod alas 5:00 sa hapon.

Dugang ni Asoy nga 60 porsyento sa lista gikan sa principal sa tunghaan samtang ang nahabilin nga 40 porsyento anaa sa barangay kapitan.

Subay sa Oral Health Month karong buwan sa Peb­rero, giedukar sa Department of Health ang tanang grade 1 students sa Cebu City Central School kagahapon sa kamahinungdanon sa pag-toothbrush.

Mokabat 600 ka mga tinun-an ang niapil niini diin mao kini ang sinugdanan sa kampanya sa DOH ug Department of Education nga oral health.

Matod ni Bernadine Hayag, tigpamaba sa DOH 7 nga aduna’y nagkadaiyang schedule ang mga tunghaan alang niini.