BUOT pasirad-an ni Mayor Tomas Osmeña ang usa sa 26 ka sangang buhatan sa Banco De Oro (BDO) nga nagbase sa dakbayan sa Sugbo.

Kini human walay bisan usa ka branch sa BDO ang naka-renew sa ilang business permit gumikan sa pagdumili sa mayor.

Iyang gipasabot mao ang branch sa Magallanes street nga nibayad lang og kapin P2,000 nga buhis matag tuig samtang mas dako pa og withholding tax ang ordinaryong janitor sa City Hall nga moabot og P5,000 kada tuig.

“I dont like to disrupt the flow of commerce in Cebu City but believe me we will survive without Banco De Oro daghan kaayong banko diha wui kon sila ra ang banko dinhi sa atong siyudad kuyaw kaayo,” padayag ni Osmeña.

“The others (branch of BDO) may follow and I don’t have to close the others because they are not supposed to open if they don’t have business permit,” dugang sa mayor.

Ang BDO adunay 26 ka sangang buhatan nga nagbase sa siyudad.

Giklaro sa mayor nga wala pa siyay petsa kon kanus-a siya momando pagpasirado sa BDO Magallanes apan aduna siyay pasumbingay ngadto sa ilang mga kliyente lakip na ngadto sa ilang sangang buhatan.

“I will not tell anyone how to run their business, I’m just giving full disclosure of this situation, the bridge is going to collapse,” pasabot sa mayor.

Si Osmeña niingon nga dili siya makahatag og pasalig sa mga depositor hilabi na ang taga siyudad apan buot niya nga masayod ang mga tag-iya og kwarta bahin sa sitwasyon sa BDO.

Matod niya nga kon magpadayon ang ilang negusyo padayon nga dehado ang siyudad ug dili siya makadawat isip mayor.

Ang BDO gipanag-iya sa SM Prime Holdings Inc. nga usa sa nakapalit sa 46 ektaryas nga luna sa SRP nga gusto niya ipakanselar.