MGA nagpuyo ilawom sa Ma­nanga Bridge gipasaligan ni Ma­yor Eduardo Gullas og relocation site sa dili pa ang Pebrero 15 aron maayo ang haligi sa maong tulay.

Si Gullas mipahibawo nga di­li siya makatugot nga mahimong babag ang informal settlers sa Sityo Mananga I, Barangay Tabunok sa pag-ayo na sa mga haligi sa Mananga Bridge.

Gisugdan na karon ang pag-ayo sa mga haligi sa Mananga Bridge, diin ang Department of Public Works and Highways (DPWH) maoy nagtrabaho.

Ang tuyo sa proyekto maong pagpalig-on sa pundasyon sa taytayan human namatikdan nga milawom na kini ug kuyaw nga mahuyang.

Gibutyag ni Gullas nga aduna sila’y relocation site apan dili kini makasarang sa taga Mananga busa siya naglaraw nga mopalit og luna ang siyudad alang sa mga naapek­tuhan.

Aduna silay suliran sa pagpalit og yuta tungod kay sa higayon nga mahibawo ang tag-iya sa luna nga himuon nilang relocation site dili na unya kini mobaligya sa ilang luna tungod kay dili sila komportabli nga himuon kining relocation site.

Samtang kadaghanan dili usab ganahan nga mobalhin tungod sa kabalaka nga malayo sa tunghaan ug sa ilang gitrabahahuan.

Ang mga residente sa lugar ang nida­ngop sa buhatan sa mayor aron tagaan sila og tabang tungod sa gibuhat sa taga DPWH nga diritsu lang matod pa og pangguba sa ilang mga panimay.

Si Gullas miingon nga dili maayo nga undangon ang proyekto tungod kay mao kini ang maghatag og lig-on sa pundasyon sa taytayan.

Aduna nay usa ka balay ang naguba samtang gikatakdang ipadayon ang pagguba saubang mga balay karong Pebrero 15.

Apan ang mga nagpuyo nagdumili sa pagpahawa hangtod nga walay ihatag ang siyudad og relocation site ngadto kanila.