GITATAW ni Mandaue City Mayor Luigi Quisumbing nga di gihapon mapatuman ang pag-ayo sa Cebu International Convention Center (CICC) bisan kon paliton sa kagamhanan sa Dakbayan ang maong pasilidad.
Sa dihang nahinabi sa mga tigbalita, si Quisumbing nagkanayon nga lisod sa kagamhanan sa dakbayan ang pagpaayo sa CICC.
Sumala sa mayor nga imbes nga mobubo og dakong pondo ang Dakbayan sa pagpaayo niini, mas gusto pa ni Quisumbing nga palambuon ang pasilidad pinaagi sa usa ka private-public partnership (PPP).
“I spend P350-million just to acquire it and I don’t want to spend another million just to rehabilitate it,” matod sa mayor.
Ang edipisyo gipanag-iya sa Kapitolyo ug niabot ngadto sa P510 milyones ang pagpatukod niini ubos sa pamunuan ni kanhi Gobernador Gwendolyn Garcia, apan ang luna pabiling gipanag-iya sa Mandaue City.
Paambit ni Quisumbing nga gi-finalize na karon sa Kapitolyo ang draft agreement sa pagpalit unya sa CICC nga mokabat sa P350 milyones, hinuon bayran sa Dakbayan pinaagi sa installment.
Ubos sa kondisyon sa pagpalit sa CICC nga unang mobayad og P150 milyones ang Mandaue ug human sa pasiunang bayad, ang Mandaue na ang modumala niini.
Ang ikaduha ug ikatulong pagbayad nga mokabat og P150 milyones ug P50 milyones nga bayaran hangtod pa sa 2019.
Si Quisumbing nagkanayon nga positibo siya nga ang Konseho sa dakbayan motugot kaniya sa paglagda og MOA tali sa Kapitolyo sanglit halos tanang konsehal sa konseho kaalyado man niya.
Matod sa mayor nga nahimo ang kasabutan tali sa lalawigan human nabutyag ang plano alang sa mga biktima sa dakong sunog sa Guizo ug Mantuyong nga kasamtangang nanimuyo sa CICC.
Human sa pag-igo sa dakong sunog sa milabayng tuig, ang Dakbayan nitugot sa mga apektadong residente nga makabalik sa ilang dapit human ma-reblock ang lugar.
Si Quisumbing niingon nga di siya gusto nga gub-on o usbon ang pasilidad apan ang maong desisyon iyang itugyan ngadto sa interesado nga partido nga buot mopalambo niini.