KAPITAN Dumpit.

Kini na unya ang tawag kang SPO1 Adonis Dumpit sugod karong Lunes human siya gitudlo ni Mayor Tomas Osmeña isip acting barangay captain o caretaker sa Ermita, usa ka semana human gipatuman ang preventive suspension batok ni Kapitan Felicisimo “Imok Rupinta” ug pito ka mga barangay kagawad.

Matod ni Osmeña nakadayeg siya kang Cebu City Councilor Dave Tumulak nga maoy mahimong caretaker sanglit gawas nga kapitan siya sa Barangay Basak Pardo kaniadto, number one councilor siya sa Cebu City.

“I think Dave is more than qualified and he’s done an excellent job but I have decided to let Dumpit do it. It’s not an easy decision but the main issue is drugs,” matod ni Osmeña.

“The druglords feared Dumpit more than Dave. Isog si Dave, isog sab si Dumpit but we have to crack down (drugs) and this is our chance to clean up the barangay. Its’ our only chance kay inig balik ni Imok, balik sab ang drugas,” pasabot ni Osmeña.

Gitug-an sa mayor nga nagkaestorya na sila ni Dumpit ug nisugot na ang pulis sa iyang tanyag human niya giingnan nga kini maoy dakong oportunidad nga mapakita sa pulis ang iyang kontribusyon sa komunidad hilabi na ang pagpapas sa ginadiling drugas.

Iyang gipahinumdoman si Dumpit kinsa iyang gipagawas sa prisohan pinaagi sa P250,000 nga piyansa, nga pending pa sa korte ang iyang apelasyon sa kasong homicide ug posib­le pa nga ma-guilty ang huwes nga siya ikonbikto kon makapakita kini og maayong labok batok sa shabu sa Ermita.

Apan dili mawagtang sa sirkulasyon sa Ermita si Tumulak sanglit patabangon gihapon siya ni Osmeña sa serbisyo nga iyang matunol sanglit siya usab ang deputy mayor for police matters.

Gawas kang Dumpit, anaa usab si Atty. Winefredo Orcullo Jr., market administrator sa Carbon, aron moabag kang Dumpit hilabi na sa mga batakang panginahanglan sama sa burial assistance ug uban pa, aron mapaabot ang ilang problema ngadto sa City Hall.