GIRETIRO sa Houston Rockets ang No.11 jersey ni Hall of Famer Yao Ming kagahapon atol sa emusyonal nga halftime sa kadaugan sa Rockets batok sa Chicago Bulls, 121-117, sa National Basketball Association (NBA).

Ang Chinese basketball legend gipili sa Rockets isip No.1 overall pick niadtong 2002. Sa kasaysayan sa NBA, siya maoy labing unang nahimong No.1 pick overall pick nga wala magtungha og kolehiyo sa Amerika.

Ang 7’6” nga higante nag-average og 19.2 puntos ug siyam ka rebounds alang sa Rockets ug nahimong global ambassador sa NBA sulod walo niya ka mga tuig nga pagduwa sa liga. Gibitay ang No.11 jersey ni Yao ibabaw sa Toyota Center kauban sa mga jersey nila ni Clyde Drexler (22), Moses Malone (24), Calvin Murphy (23), Hakeem Olajuwon (34) ug Rudy Tomjanovich.

Ang halftime ceremony gisugdan pinaagi sa video nga nagpakita sa highlights sa NBA career ni Yao. Nakita sab sa video sila sin Olajuwon, Steve Francis, Dikembe Mutombo, Shane Battier, NBA commissioner Adam Silver ug Rockets owner Leslie Alexander. AFP/ESL