TASTAS ang liog ug duha ka mga samad sa likod ang naangkon sa usa ka dispatser human giluba sa iyang kauban niadtong Biyernes sa Abellanosa- Capistrano Street, dakbayan sa Cagayan de Oro.

Kritikal ang kahimtang ni Angelito Anduyan, 38, ulitawo, taga Barangay Indahag ning dakbayan, samtang ang suspek nailang si Jeime Tabanya alyas Junjun, 38, taga Barangay 17 ning dakbayan, kinsa pulos mga dispatser.

Sa nahipos nga impormasiyon gikan sa Police Station 1 (PS1) sa Divisoria, gikabutyag nga samtang nag-dispatch ang duha sa maong dapit nagbikil kini.

Wala usab makamatikod ang biktima sa dihang kalit nga mibunlot og double blade nga kutsilyo ang suspek dayong duslak-duslak sa lawas sa niini.

Dali usab nga miresponde ang kapolisan gikan sa PS1 ug gi-adtoan sa balay ang suspek, hinungdan nga boluntaryo kining migawas ug mitahan gani gi-angkon usab niini ang nahimong pagpangdunggab.

Sa bahin sa suspek, gibutyag niini nga una nga nanghangyo nga siya una ang mang-dispats kay lage taod-taod na nga naabot sa maong dapit si Anduyan apan gisingka-singkahan siya hinungdan nga iya kini nga gi-dunggab sa ika-upat ka higayon.

“Naay nabiklan gamay, sa pagdispats ra gihapon, abusado man gud kaayo to sirok kaayo, nihangyo raman ko niya nga ako sa’y mang dispats kay ganina raman siya nakaabot ako bag-o paman ko naabot, gisingka-singkahan naman nuon ko," pahayag ni Tabanya.

Nakaangkon og samad dinunggaban sa likod ug ilabi na sa liog ang biktima hinungdan nga anaa kini sa kritikal nga kahimtang.

Sa pagsulat niini nga balita, padayon pa nga nagpaalim sa Northern Mindanao Medical Center ning dakbayan samtang ang suspek ang nagtingkagol na sa Maharlika Detention Cell.