IGO na lamang sa pagpatala ang asawa human nga nakita mismo niini ang bana kauban sa kabit nga naglingaw-lingaw ug naghalog-halog Sabado, Pebrero 4, mga alas 12:30 sa tungang gabii sulod sa bar nga nahimutang sa Yacapin Street, dakbayan sa Cagayan de Oro.
Nagpatala ang 50 anyos nga asawa human sa iyang nasaksihan sa iyang bana nga 48 anyos, taga Barangay Carmen ning dakbayan.
Sa impormasiyon gikan sa Police Station 1 (PS1) sa Divisoria, gikabutyag nga gipanid-an sa asawa ang iyang bana gumikan sa mga pagduda niini, ug napamatud-an nga aduna kini laing babaye human nga nakita gayud mismo ang iyang bana kauban ang babaye nga gitoohan niini nga kabit.
Giingong sulod sa bar, naglingaw-lingaw ang iyang bana ug ang kabit niini ug nakita gayud nga sweet kaayo ang duha, hinungdan nga sa iyang kalagot iyang giduolan.
Gidugang pa nga iya na unta kining kumprontahon apan dali kining gipasibat sa iyang bana hinungdan nga igo na lamang kini sa pagpatala.
Sa pagsulat niini nga balita, ang insidente ang nakatala na sa buhatan alang sa tukmang disposasiyon.