German national napalgang patay

GITUOHANG gi-atake ang usa ka German national nga napalgang patay ug nagkadugo ang dagway ilalom sa katre sulod sa gi-abangang lawak sa usa ka hotel nga sa T. Neri- Capistrano Streets ning siyudad sa Cagayan de Oro.

Ang biktima nailang si Klaus Dieter Fischer, 62, ulitawo, kinsa niadtong tuig 1999 pa, nipuyo sa maong hotel ug ulahi kining nakita nga buhi niadtong Enero 29 ning tuig.

Sa impormasiyon gikan sa Police Station 1 (PS1) sa Divisoria, gikabutyag nga namatikdan sa roomboy sa maong hotel nga si Errol Magbanua ang dili masabot nga baho gikan sa lawak sa maong langyaw, hinungdan nga ila kini nga gisusi.

Nadiskobre nga wala nay kinabuhi ang German national.

Girespondehan usab sa otoridad lakip na sa tinugyanan sa Scene of the Crime Operatives (Soco)-Northern Mindanao sa pagpangulo ni Police Chief Inspector Charity Caseres, ug sa inisyal nga imbestigasiyon, giingong napalgan sa ilalom sa katre ang biktima kinsa napuno sa dugo ang dagway niini.

Gibutyag usab sa management sa hotel nga posibleng gi-atake sa sakit ang biktima gumikan kay sa kadugayon na niini sa hotel, namatikdan niini nga kusog kaayo kini manigarilyo ug mo-inom.

Wala’y nakitang foul play sa kamatayon niini gumikan kay wala’y nakitang mga samad sa lawas niini apan kinahanglan pa gihapon kini nga ipa-ilalom sa otopsiya aron nga masuta ang tinuod nga hinungdan niini.

Sa pagsulat niini nga balita, ang insidente ang nakatala na sa buhatan ug anaa sa kustodiya sa kapolisan ang tanan niini nga mga butang samtang ang PS1 mi-request nga kinahanglan pa gihapon nga mapa-ilalom sa otopsiya ang patay nga lawas alang na usab sa pamilya niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph