GAWAS sa dalan nga mora'g lunangan, naa pa si Tarzan sa Cabantian. Kadtong nagaagian dihang dapita padulong sa Milan makakita niining tawhana.

Dako ang bayhon niining tawhana nga mora'g si Tarzan. Taas siya nga medyo mestiso, taas ang buhok, bus-ok og lawas, naghukas lang ug daw nagbahag tungod sa busluton niya nga short pants.

Kanunay kining makit-an nga maglakaw padulong sa may bandang Chula Vista ug Emily Homes diin posible siya nagpuyo.

Gawas sa iyang hitsura, dili mailhan nga dunay problema sa iyang pangisip kay dili man buang ang iyang nawong. Gani tambok siya ug way timailhan nga naglisud sa panginabuhi.

Gitawag lang siya'g Tarzan kay kulang na lang og unggoy, puwede na siyang artista sa sine.

Ang sakit sa pangisip dili dayon mabantayan nato apan delikado tungod kay wala pay hingpit nga paagi sa pagtambal niini.

Matud pa sa akong amigo nga si Sir Ezekiel Bardoquillo nga moabot og 8-10 ka tawo ang iyang nakit-an nga adunay problema sa pangisip nga naglibot-suroy gikan sa iyang pinuy-anan sa Barangay Cabantian hangtud sa downtown. Ambot kaha kung nakalayas ba kini gikan sa Mental Hospital kay makit-an man gihapon sila sa kadalanan?

Tungod niini, naghimo og sulat si Sir Ezekiel sa atong mga konsehal ug sa DSWD aron maghimo'g programa sa mga susama kanila.

Hangtud karon wa pa koy nasayran nga malangkubon nga programa sa mental health ang gobyerno gawas sa tradisyonal nga pagbutang kanila sa Mental Hospital. Lisud ug dugay sab ayuhon ang sakit sa pangisip. Aduna pay stigma sa mga tawo ug pamilya nga may ingon niini nga balatian.

Busa angayan kining lantawon sa ahensiya sa panglawas ug sa mga pribadong grupo nga gustong mohimo og serbisyong sosyal sa katawhan.

Daghan ang hinungdan sa problema sa sakit sa pangisip. Usa niini ang pagkalulong sa gidili nga druga, depresyon tungod sa dakong gihambin nga problema, nabughat gikan sa pagpanganak o grabe nga pagsakit, ug nakuha sa iyang kagikan.

Mao seguro kini ang giingon ni PRody nga may sakit sa pangisip ang tanang nga adik sa gidili nga druga nga lisud nang ayuhon pa.

Anaa say nabuang tungod sa gugma, sa bisyo ug sa pangandoy nga wa matuman. Duna koy kaila kaniadto nga DJ sa usa ka iladong istasyon sa radyo nga nabuang kay wala daw siya ka-toothbrush ug hugaw kaayo ang iyang pamati sa iyang kaugalingon. Naay poy kaila nako nga si Junior Buang nga nalisoan sa iyang pangisip kay nalibog kung giunsa pagpatuyok sa rebulto sa Sto. Nino ibabaw sa plato.

Matud pa sa istorya sa akong higala nga si James Bama nga bright ug mahigalaon kini si Junior. Gidapit siya sa iyang klasmeyt sa pista sa Sto. Nino sa usa ka baryo.

Sa pista, adunay nagmadyik nga tiguwang nga nagpasayaw-sayaw sa gamay nga rebulto sa Sto. Nino sa ibabaw sa sartin nga plato. Hastang kahibulong ni Junior ug iyang gisulayan sa pag-uli.

Wala siyay guwa-guwa ug walay kaon sa ilang balay aron masakpan lang ang sekreto sa tiguwang. Pag-abot og pipila ka semana, gitawag na siya'g "Junior buang".