COTABATO CITY - Gibanlas ang 14 ka mga balay sa kalit nga bul-og sa baha alas 10:20 sa gabii niadtong Biyernes didto sa usa ka barangay sa lungsod sa probinsiya sa Maguindanao.

Matud ni Ameer Jehad Ambolodto, team leader sa Maguindanao People's Medical Team, kalit lang miigo ang baha sa Sitio Panambingan, Barangay Tuayan, Datu Hoffer Ampatuan.

Maayo na lang kay abtik nga nakabantay ang mga molupyo sa maong lugar ug nanagan dayon paingon sa luwas nga dapit una gibanlas ang ilang mga pinuy-anan.

Samtang pito sab ka mga binuhing baka ang gianod sa baha ug wala pa makit-an.

Gikanayon ni Ambolodto nga 55 ka mga molupyo sa maong dapit ang nawad-an og balay gumikan sa baha.

Abtik sab nga nang-apud-apod og hinabang ang Maguindanao People's Medical Team nga gipangulohan ni Lynette Aguilar Estandarte ngadto sa mga biktima sa baha.

Nagpasidaan sab si Governor Esmael "Toto" Mangudadatu sa mga namuyo daplin sa sapa ug kabukiran nga dili mokompiyansa sa bul-og sa baha ug pagdahili sa yuta (landslide) ilabi na nga misulod na ang Bagyong Bising sa nasud. (Edgar E. Fuerzas)