SUBRA na sa usa ka semana nga nahimo nakong temporaryong pinuy-anan ang usa ka tambalnanan sa uptown area sa dakbayan sa Sugbo. Nagbantay ko sa akong asawa nga may problema sa pagginhawa tungod sa hubak. Taudtauo na niya kini nga gihambin sukad pa niadtong panahon nga bag-o pa mi nga naminyo.
Sama sa ubang balatian di ni sayon kay may kalabutan man sa iyang pag ginhawa. Moataki na gani ang ubo nuntan sa pagpangluya sa lawas apektado gyud ang pag ginhawa. Mao nga kung lisod na gyud ang pag ginhawa ang ospital na ang puntarya. Sa mga pamilya nga dunay sakop nga hubakon sayod kung unsa ka pait kung ospital na ang hisgutan.
SALAMAT
Taliwala sa mga pagsula gusto nakong pasalamatan ang mga doktor, mga nurse ug hospital staff sa ilang serbisyo.
Unya kay natayming man nga nagsaulog ko sa akong adlaw’ng natawhan sa tambalanan gusto sab nakong pasalamatan ang akong mga manghod ug pag-umangkon sa ilang presensiya ug pag-unong sa among sitwasyon. Sama sa ubang pamilya ang pag-inunongay maisip nga usa ka hiyas nga di kabayran ug sapi.
Bisan didto sa gawas sa nasod wa gyu’y paglubad. Ang atong namat-an ug kahayag nga maoy gimatuto sa atong katigulangan nagpabiling buhi ilabi na sa kabataan. Ang pagbisita ug mga masakiton ilabi na kung ang ilang mga balatian wala idili sa ilang mga doktor nga dunay moduaw mas nindot. Sa akong pagtoo ang mga pasyente bisan unsa kalisod sa ilang sitwasyon kung dunay moduaw masihag ang mga pahiyom.
MILITAR
Dunay daghang nangutana labot sa partisipasyon sa mga sundalo sa kampanya ni Presidente Duterte batok sa ilegal nga drugas.
Ang pangutana nasentro sa gimando sa Presidente sa ilang papel uban sa taga Philippine Drug Enforcement Agency (PDEA). Akong natawgan gahapon si Lt. Col. Luzmindo Mamauag ang tigpamaba sa Central Command.
Ako siya nga gipangutama mahitungod ning maong isyu. Matod niya wa pa sila makadawat ug guidelines sa maong kamanduan. Matod niya mentras tanto ang ilang matunol nga tabang sa PDEA mao ang presensiya sa mga sundalo sa ilang operasyon. Siya niingon nga kutob ra sila sa security sa mga dapit nga dunay operasyon ang PDEA.
Gawas ini motunol sab sila ug mga intellegence information ngadto sa PDEA sa mga tawo nga nalambigit sa drugas. Sa laktod di sila apil sa pagpanakop. Ang ilang trabaho sa pagka karon mao ang pagtunol ug siguridad sa mga ahente sa PDEA nga naghimo ug operasyon sa usa ka dapit.
Kini nga hilisgutanan gusto nakong ipaabot sa mga tawo nga nangutana nako kung ang militar ba mangunay ug dakop sama sa gihimo sa mga pulis sa Project Tokhang.
Ang giingon ni Lt. Col. Mamauag kutob ra sila pagtunol ug security sa mga ahente sa PDEA nga moataki sa usa ka dapit. Limitado ra tinuod ang ilang papel pero wa ni magpasabot nga sayon sayonon lang sila sa mga hingtungdan.
Hinumdumi kining mga sundalo gibansay bansay sa pagpakig-away sa mga rebelde. Sa ato pa kung durugista lang ang mangisog ug magsuki suki sa ilang bag-ong trabaho basin dugoon ang mahitabo.