USA ka combo building nga magsilbi unyang command center nga mokantidad og P13 milyones idonar sa Aboitiz Foundation (AF) ngadto sa dakbayan sa Talisay.

Matod ni Mayor Eduardo Gullas nga kini maoy pagsanong sa Aboitiz sa iyang hangyo sa dihang siya midaug nga tabangan siya sa iya karong administras­yon.

Si City Engineer Gamaliel Vicente, Jr. nibutyag iya nang naduso ang ilang hinimong program of works ngadto sa Aboitiz Foundation pinaagi sa buhatan ni Eric Ching.

Gibutyag ni Engr. Vicente nga kon mauyonan na kini sa taga A­­boitiz hayan maghuwat nalang sila nga masugdan ang pagtrabaho.

Nasayran si Mayor Gullas ug taga Aboitiz nagkasinabot nga ang Talisay maoy mohatag og luna samtang ang Aboitiz na ang bahala sa gastuhan sa pagpatukod og edipisyo.

Ang luna nga gigahin sa siyudad mao ang tuo nga bahin sa Plaza Talisay nga naa sulod sa compound sa City Hall nga adunay gidak-on nga 500 sq. meters apil na ang par­king area.

Matod ni Gullas, ang edipisyo maoy magsilbing command center diin ipahimutang ang mga buha­tan sa City Disaster Risk Reduction and Management (CDRRM), Fire Department, Medics, Police Sub-Station ug uban pa.