USA ka anti-criminality nga kampnaya ang gihimo sa kapulisan sa dakbayan sa Mandaue ngadto sa mga tinun-an sa Mandaue City Central School sayo ning semnaha.
Di mominos sa 900 ka mga tinun-an sa Grade 4, 5, ug 6 ang nitambong sa seminar sa tunghaan.
Matod ni P/CInsp. Mercy Villaro, spokesperson sa Mandaue City Police Office (MCPO), nga ilang gihimo ang kampanya sa tunghaan human nga nakadawat silag mga reklamo sa mga magtutdlo nga nagsugod na og bisyo ang uban sa mga tinun-an.
Dugang ni Villaro nga may magtutudlo nga nangayo og tabang kaniya unsaon pagwagtang sa “vape” nga niuso na karon sa mga estudyante.
Atol sa seminar, ang mga topic nga gihisgutan sa MCPO mao ang bati nga epekto sa drugas, child protection, anti-bullying, sexual harassment ug children in conflict with the law.
“Giapil gani namu og hisgot sa ilaha kay siyempre as a bata at least aware sila kun asa sila mosumbung pag-ilang mga ginikanan ug inahan gidapatan gipang-abuso,” ni Villaro.
Sumala pa ni Villaro nga ang city central mao nay ikalimang tunghaan nga ilang nabisita human sa Basak, Paknaan, Subangdaku ug Casili.
Dugang niya nga mohimo unya sila ug laing seminar alang sa mga bata apan ang mga ginikanan na ang patambungon.