GITAKDA sa Land Transportation Franchising and Regulatory Board (LTFRB) sa Central Visayas karong Biyernes ang hearing bahin sa pagkaaksidente sa usa sa mga bus sa Vallacar Transit sa lungsod sa Tuburan sa miaging semana.

Si Reynaldo Elnar, assistant regional director sa LTFRB 7, nibutyag nga ang mga opisyal ug drayber sa Ceres bus nga naaksidente ang paatubangon sa ilang buhatan sa ala 1:00 sa hapon.

Siya niingon naisyu na ang show cause order batok sa Vallacar Transit niadtong Biyernes.

Matod niya bisan kon wa na mopadayon og kiha ang mga kabanay sa duha ka tawo nga nangamatay sa aksidente, magpadayon ang ilang imbestigasyon.

“Sa among party, ipatawag gihapon sila kay naa man silay obligasyon, patubagon gihapon nato sila kon angayan ba o di suspensuhon o kanselahon ang ilang prangkisa,” dugang ni Elnar sa Superbalita Cebu.

Ang Vallacar Transit maoy operator sa mga Ceres bus.

Si Ruben Umpad, drayber sa Ceres bus nga nalambigit sa aksidente, gibuhian na sa kapulisan sa Tuburan Police Station sa miaging semana human nagkasabotay ang duha ka mga habig.