NANGAGUBA na ang bag-ong sementadong dalan gikan sa Barangay Binaliw gikan sa Barangay Pit-os sa bukirang dapit sa dakbyan sa Sugbo sa pagsige og agi sa 10-wheeler dumptrucks nga naghakot og filling materials gikan sa duha ka quarry sites sa Binaliw.

Usa ka quarry nahimutang sa Binaliw 1 ug laing usa sa Binaliw 3 kansang dumptrucks magsunodsunod og hakot sa mga yuta ug bato gikan sa quarry sites.

Si Mayor Tomas Osmeña nagkana­yon nga wala siya makadawat og report gikan sa mga opisyal sa Binaliw bahin sa quarry operations lakip sa pagkaguba sa dalan.

Sa pagkakaron, ang mga motorista maglisod na pag-agi ug nahimong risgo sa kinabuhi sa lumalabay sa dapit.

Ang mayor nibutyag nga dili pa siya makaatiman sa maong problema sa pagkakaron sanglit daghan pa siya og giatiman nga problema sama sa trapiko, nahitabong pagbaligya sa 46 ektaryas nga yuta sa South Road Pro­perties (SRP) ug ang kasong tax evasion batok sa land developers sa SRP.

Gipadayag sa mayor nga adunay gahom ang barangay sa pagsulbad sa maong problema.

Gitug-an sa mayor nga iya na usab unya tapukon ang Cebu City Mining and Regulatory Board aron mosusi sa quarry operations sa bukirang dapit.

Ang Superbalita Cebu nisuway og tawag kang Barangay Kapitan Wilson Bacor apan dili makontak ang iyang cellphone ug ang telepono sa ilang barangay mag-sige ra usab og bagting.

Ang maong quarry operations nagsugod atol sa administrasyon ni kanhi Mayor Michael Rama ug hangtod karon nagpadayon.

Naobserbahan sa Superbalita Cebu nga ang nagbuntaog nga bukid kaniadto, karon nahimo na nga patag partikular sa Binaliw 3 ug nagsugod na usab og kaiban ang bukid sa Binaliw 1, eskina nga dalan paingon sa Barangay Mabini gumikan gihapon sa maong operasyon.

Sila si Konsehal Pastor Alcover Jr. ug Konsehal Jerry Guardo nipadangat na sa ilang privilege speech sa konseho apan hangtod karon wala pay aksyon nga gihimo ang siyudad.

Wala pa masuta kon aduna bay mga legal nga dokumento ang ilang pagkubkob sa yuta. Kon aduna man, nakapangutana ang mga residente sa kabukiran nganong wala makontrolar sa barangay o siyudad ang operasyon nga niresulta sa pagkaguba sa bag-o ug daang sementadong dalan.