NINGPATIGBABAW sila si Prince Joey Lee ug Lovely Andrin sa 1st I Love Run: Born From the Heart sa Axis Courtyard, Vibo Place sa dalan Escario, siyudad sa Sugbo kagahapon.
Si Lee maoy midaog sa men’s 10K pinaagi sa oras nga 33:48 diin iyang nalupig ang Kenyan runner nga si Douglas Mwiti og walo lang ka mga segundos.
Ang 3rd placer mao si Ariel Seballa, kinsa adunay oras nga 34:52.
Samtang si Andrin maoy milampos sa women’s 10K pinaagi sa oras 48:09.
Nagsunod kang Andrin mao ang iyang igsuon nga si Cherry, kinsa mitali og oras nga 48:10. Ang 3rd placer mao si Michelle Beboso, kinsa adunay oras nga 49:49.
Ningdaog sa men’s 5K mao si Kenyan James Mibie (17:10) samtang si Kisha Mae Delechos sa women’s 5K (23:35).
Sa kiddie dash, sila si Dexter Lucido ug Ancent May Ababa mao ang ningdaog sa boys’ and girls’ 10 to 12 division samtang sila si Coreon Paulter Canas ug Jam May Sotero sa boys’ and girls’ 7 to 9 division.
Ang lumba, nga giorganisar sa Central Visayas Adoptive Parents Association (Cvapa), usa sa mga kalihukan sa Adoption Consciousness Week.