NAHIMONG winningest coach si Greg Popovich human gitambak sa iyang San Antonio Spurs ang Denver Nuggets, 121-97, atol sa NBA regular season niadtong Dominggo, Pebrero 5, didto sa AT&T Center, home sa Spurs.

Nitala na si Popovich og 1,128 nga daug sa iyang coaching career ug naapsan niya ang kanhi coach Jerry Sloan, kinsa nailhan sa iyang pagdala sa Utah Jazz batok sa Chicago Bulls sa duha ka sunod-sunod nga NBA finals sa dekada 90.

Nipupo si Kawhi Leonard og 19 puntos sa dula, samtang nihatag sab sila Manu Ginobili, Tony Parker ug Jonathan Simmons og 18 puntos matag usa.

Nibuak ang Spurs sa hingpit nga sangka ug nakakuha og buylo sa ika-tulo nga kwarter pagbinat nila og 23 puntos nga labaw.

Gihawiran pa gayud sa Spurs sa kataposang kwarter diin nibinat sila sa ilang kinataas nga labaw nga 25 puntos.

Gikan ana, wala makahulga ang Nuggets hinungdan nahatag nila ang kadaogan ngadto sa Spurs.

Ang Spurs solidong naa sa ikaduha nga pwesto nga adunay 39-11 win-loss record sa western conference, samtang ang Nuggets nagbitay sa ikawalo nga anaay 22-28.