BANSALAN, Davao del Sur - Nakauli na sa ilang panimalay ang bise mayor ning lungsod human sa pipila ka bulan nga nag-indefinite leave of absence sa trabaho tungod sa iyang kidney transplant didto sa St. Luke Medical Center sa kauluhang Manila.
Dako sab ang pasalamat ni Vice Mayor Edwin Reyes nga wa siya maglisod pagpangita og donor sa iyang operasyon human usa ka 21-anyos nga lalaki ang nag-match sa iyang kidney gikan sa Barangay San Isidro, Magsaysay, Davao del Sur.
Sa pakighinabi sa SunStar Superbalita, gibutyag ni Reyes nga tinuod nga aduna siyay suspension order gikan sa Ombudsman apan nakakuha siya og motion for reconsideration mao nga di una mapahamtang ang maong silot.
Nanukad ang mando human mireklamo ang usa ka regular nga kawani sa munisipyo sa pagkataktak niini sa trabaho dihang nahimong mayor si Reyes ug nagpagawas og hukom ang Civil Service Commission (CSC) nga bayaran ang suweldo sa mga adlaw nga nawala gikan sa namatay na nga si Junelan Mantica.
Apan wala gipatuman ni Reyes ang hukom human nga mismong pamilya ni Mantica ang buot mokobra sa salapi ug gibarogan sa bise-mayor nga didto niya ihatag sa buhing asawa ni Mantica.
Daling gipakatag sa mga kritiko ni Reyes ang mga dokumentong nagpamatuod nga suspendido kini sa trabaho ug di kini mahimong modawat og sweldo sud sa unom ka bulan.
Apan, sumala sa bise-mayor, human gitugtan sa korte ang ilang mosyon di una mapahamtang ang kamandoan mao nga gitakdang mobalik na siya sa trabaho sugod karong adlawa, Lunes.
Luyo niini, wa gikompirma sa bise-mayor nga siya na mismo ang mahimong presiding officer sa regular session sa Sangguniang Bayan nga natunong sab karong adlawa, gawas sa pag-ingong mosulod na siya sa iyang opisina.
Hinuon, giklaro sa bise-mayor nga andam siya kanunay nga modawat og mga bisita sa ilang panimalay bisan og adunay limitasyon nga gihatag ang iyang mga doktor.
Sumala ni Reyes nga di niya buot mapasagdan ang iyang trabaho ilabi pa ang mga katawhan nga iyang gi-alagaran mao nga wa niya gidid-an ang mga tawong buot makighimamat kaniya.
Gipasiatab sa mga kalaban sa politika ni Reyes nga ikaduhang suspensyon na ang iyang nadawat human nga gisuspende sab kini niadtong mayor pa siya dihang nahitabo ang sunog sa merkado publiko.
Si Reyes mitugot sa mga yanong negusyante nga mamaligya og pabuto duol sa merkado nga maoy nahimong pabilo sa sunog.
Gitataw sab sa bise-mayor nga bisan sa mga kasong iyang giatubang nahitabo kini tungod sa iyang paglantaw sa kahimtang sa panginabuhian sa mga gagmay nga negusyante sa lugar.
Si Reyes midason nga nahuman niya ang siyam ka tuig nga nahimong mayor nga nagpamatuod nga dako ang pagsalig kaniya sa katawhan ug gipasigarbo niya nga wa siya nangawkaw sa pundo sa gobyerno. Orlando B. Dinoy