GIPANGBALIK na sa ilang mga unit nga police stations ang mga pulis nga naglangkob sa City Anti-Drugs Special Operation Task Force (CAIDSOTF) sa Davao City Police Office (DCPO) human kini gibungkag subay sa paghunong sa operasyon sa “war on drugs” sa kapulisan sa nasud.

Si DCPO director Senior Superintendent Michael John Dubria nagbutyag nga ila kining gihimo aron makatabang sa ubang nga bulutahon.

“Binalik na namin ang mga pulis from CAIDSOTF sa mga stations na pinaggalingan nila,” butyag ni Dubria.

Ang hepe sa CAIDSOTF nga si Chief Inspector Mario Galendez maoy gibutang nga hepe sa City Administration sa DCPO hulip sa miretiro nga si Superintendent Angel Sumagaysay.

Una niini, nagpasalamat sab ang DCPO nga temporaryo silang mihunong sa operasyon sa druga aron ilang mahatagan og taas nga panahon ang pagsulbad sa mga nag-unang street crimes ug mga crimes againts property.

Ang DCPO gilangkuban sa dul-an sa 3,000 ka mga pulis nga ang 1,000 niini gibutang isip mga foot patrollers nga maoy mipatuman sa ilang police visibility. (JPC)