Gipatay sa bus; whistleblower diay sa bilibid

ANG Davao del Norte Provincial Police Office (DNPPO) padayong naghimo og makuting imbestigasyon sa pagpusil-patay sa giingong whistleblower sa prostitusyon ug kurapsyon sa New Bilibid Prisons (NBP) kinsa gidestino sa Davao Prison and Penal Farms nga mas nailhang Davao Penal Colony (Dapecol).

Si Chief Inspector Eduardo Jungco, hepe sa Carmen Municipal Police Station, nag-ila sa biktima nga si Kabungsuan Makilala, hamtong ang pangedaron, security officer sa Bureau of Corrections (BuCor), kinsa gipusil sa riding in tandem alas 9 sa buntag niadtong Sabado samtang sakay sa Bachelor Bus didto sa Carmen, Davao del Norte.

Si DNPPO Director Senior Supurintendent Ferdinand Sifuentes namahayag nga wala pa silay mahatag nga lig-on nga impormasyon kung unsay hinungdan sa panghitabo sanglit nagpadayon pa ang ilang imbestigasyon.

Sa Official Facebook page sa People's Television (PTV) gipakita ang mga hulagway sud sa Bachelor Bus diin naglingkod si Kabungsuan sa pagpusil kaniya sa mga mamumuno.

Giingon sa DNPPO nga dunay upat ka pasahero sa bus ang naangol lakip na si Police Officer 3 Pablo Paolo kinsa miresponde sa pagpamusil.

Kahinumdoman, tuig 2012 naglusad og imbestigasyon ang Department of Justice (DOJ) labot sa giingong kurapsyon sud sa Bilibid subay sa gipangbutyag ni Makilala.

Sa testimonya ni Makilala, iyang giduot sa maong mga pasangil ang kanhi mga director sa BuCor nga sila Director Ernesto Diokno ug Director Gaudencio Pangilinan.

Tungod sa hitabo, si Whistleblowers Association of the Philippines president Sandra Cam mikoordinar kang BuCor director Benjamin Delos Santos labot sa pagpatay kang Makilala.

Sa pakighinabi kang Cam sa usa ka radyo nga nakabase sa Manila, si Cam ngasulti nga ang kamatayon ni Makilala usa ka “eye opener” ngadto sa DOJ gumikan usa-usa nang gipamatay ang mga testigo sa alegasyong kurapsyon sud sa Bilibid.

Nasayran sab nga niadtong Pebrero 2012 midangop si Makilala kang kanhi DOJ secretary Leila de Lima aron mohangyo og proteksiyon sa iyang kinabuhi ug sa iyang pamilya.

Giingong gitanggal si Makilala ni de Lima sa Witness Protection Program ug gidestino kini sa Dapecol diin giingon ni Cam nga abli na hinuon kini sa delikado nga sitwasyon.

Ang biktima ang ikatulong opisyal sa Dapecol nga gipusil-patay una ang pagpatay nila Robert Quinto ug Willy Plasabas sa miaging tuig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph