SIBAW ang mga hungihong kagahapon nga duna nay mga duha ka konsehal nga sakop sa Team Rama nga mobalhin na sa BOPK. Tinuod ba kini? Wa pa koy confirmation. Apan nagtuo ko nga mahitabo gyud kini.
Nganong motuo ko sa maong istorya-istorya?
Una, dugay na ko nakabantay nga wala nay pulos ang mayorya sa Team Rama diha sa Konseho kay makuha ra man gihapon ni Mayor Tomas Osmeña ang iyang gustong mahitabo. May pag motapon na lang sila sa BOPK aron makaapil pa sa mga benepisyo isip kaalyado sa mayor.
Angayang panaminan ang nahitabo kang Konsehal Dave Tumulak ug Konsehal Hanz Abella.
Lalim bay si Dave usa sa giduso ni Mayor Osmeña nga mag-caretaker sa Barangay Ermita. Si Hanz ang gisaligan karon nga moduso niining pagbaligya og tulo ka hektarya diha sa SRP.
Sa akong tan-aw, ang pagbalitok og duha pa ka konsehal mahinungdanon aron makumpleto ang pagka mayorya sa BOPK. Kinahanglan kini aron di na makalangay ang Team Rama. Gani, di na kinahanglan ang boto ni Bise Mayor Ed Labella isip tie-breaker.
Ang magpabilin sa Team Rama, igo na lang na silang magsabasaba kay di na man sila mayorya. Tingale, maghulat sila kanus-a magdungan og leave ang mga sakop sa BOPK.
Ikaduha, daw nahuyang na ang gahum ni Presidential Assistant Mike Dino nga wala makababag sa suspensyon ni Barangay Kapitan Imok Rupinta. Wala gani siya makaduso sa mga replacement nga gi-endorse ni Rupinta.
Kahinumduman, dihang ginganlan ni Presidente Rody Duterte ang lider sa Team Rama isip drug lord protector, si Dino ang nilihok aron dawaton sa PDP-Laban, buot ipasabot sa kampo na sa administrasyon, ang mga sakop sa Team Rama, minus sa kanhi mayor.
Sa pagkakaron, wala maka-deliver si Dino sa gikinahanglan nga tabang sa Team Rama diha sa Ermita. Tilimad-on kini kon asa padung ang hangin.
Hinuon, possible pa kining makabawi si Dino. Di lang ko makatantyag nga igo ba kini nga makapugong sa gipaabot nga pagbali sa mga duha ka mga konsehal.
SRP
Ato nang nahisgutan ang pagduso karon ni Konsehal Hanz Abella sa pagbaligya og tulo ka hektarya sa presyo nga P110,000 per square meter. Dako kaayo kini kon itandi sa pagbaligya ni kanhi mayor Mike Rama og 45 ka hektarya kaniadto sa presyo nga P38,000 per square meter.
Kon madayon kini, moguwa nga sakto si Mayor Osmeña nga kon nihulat si Rama sa pag-abli sa SM Seaside, dako unta og ginansya ang Syudad sa Sugbo.
Buot ipasabot, ang pagdali-dali ni Rama kaniadto niresulta sa pagbaligya sa SRP nga barato kaayo.
Ako karong gipaabot kon unsay sunod lakang sa mga konsehal sa Team Rama kabahin niini. Mobabag ba sila sa usa ka lakang nga makaayo sa Syudad sa Sugbo apan makapruweba nga nasayop diay si Rama kaniadto?
O mouyon ba sila niini?
Mopusta ko nga moagi kadiyot kini og paglangaylangay pinaagi sa di pagtambong sa hearing sa mga sakop sa Team Rama dayon dunay mo-abstain.
Bisan pa man, moguwa nga kiko ang ilang baruganan. Mas maayo pag mouyon na lang sa way daghang langas.
Signal Jammer
Nakapahimuot kanako ang reaksyon sa mga jail guard niining pagpalit og mga signal jammer aron ibutang diha sa New Cebu City Jail.
Kon mataud na ang mga signal jammer, wa nay makatawag nga mga inmate ngadto sa gawas. Maguba sab ang usa sa mga negusyo sa mga guwardiya. Kay nganong mobayad pa man ang mga priso nga mogamit og cell phone kon wa ra gihapoy signal?
Hinuon, makakita man og lusot unya ang mga ilegalista. Siguruon lang gyud sa mga awtoridad nga di masabotahe ang signal jammer sa panahon nga dunay drug lord gustong manawag.
(@anol_cebu sa Twitter)