SAYAW. Niadtong Sabado sa gabii gilunsad sa Benedicto College, Mandaue City ang “BAHANDI”, usa ka pasunda­yag sa atong kultura pinaagi sa sayaw.

Ang San Diego Dance Company maoy mipasundayag sa nagkalainlain nga kultura sa atong nasud gikan sa pagdiskobre ni Magellan sa Cebu, ngadto sa Ifugao ug Muslim pinaagi sa sayaw didto sa teatro sa Benedicto College.

Si kanhi Philippine Ambassador Frank Benedicto, nga maoy nagmugna niadtong Tuig 2000 sa Benedicto College, gusto nga iyang kolehiyo ang mopasundayag sa mga tinipigang bahandi sa atong kultura pinaagi sa sayaw duyog sa San Diego Dance Company.

Sa iyang pamahayag sa iyang pag-abli sa programa, si Ambassador Benedicto mii­ngon nga usa ka dakong garbo sa Benedicto College nga maoy moabli sa publiko ning usa ka talagsaon nga programa.

Matud pa ni Benedicto nga pagahimuon ang pasanduyag sa makausa o makaduha sa usa ka buwan aron mapukaw ang kahibawo sa mga Filipino, labina sa mga batan-on, ug sa mga turista sa kabahandianon sa atong kasaysayan.

Mga opisyales sa Cebu sama ni Bise Gob. Agnes Magpale, Kong. Gwen Garcia, Kong. Raul del Mar, mga opisyales sa dakbayan sa Mandaue, mga sakop sa media ug mga travel agents ang giimbitar sa maong paglunsad.

Miawhag ug mihangyu si Ambassador Benedicto sa mga kadagkoan sa kagamhanan sa Sugbo, sa media ug sa mga travel agents nga makaayuda sila aron molampos ning maong programa.

Akong pasalamat ni Ambassador Benedicto sa pag-imbitar. Ako usab nga pahalipay sa San Diego Dance Company ug sa Benedicto College sa maanindot kaayo nga pasundayag, nga angayan gyud nga atong suportahan ug ipakita sa uban nga kanasuran.

****

KAHIBUDNGAN. Tungod kay ang mga piniriso New Cebu City Jail nagsige gihapon og negosyo sa ilegal nga drugas ginamit ang sa cellphone sulod sa selda, si Cebu City Mayor Tomas Osmeña mopalit og “jammer”.

Ang balor sa “cellphone jammer” nga ipapalit ni Mayor Tomas P245,000 ang usa. Ang upat mobalor og P980,000.

Maingon nato nga gamay ra ang kantidad apan way pus ang pagpalit niini kon ang mga gwardiya ug mga opisyal sa BJMP magyaya lang gihapon ug makalusot ang cellphone ngadto sa selda sa mga pinireso.

Gani, ang angayan nga manubag nganong nakasulod ang mga cellphone sa selda sa mga pinireso ang mga gwardiya ug opisyal sa BJMP nga maoy nagbantay sa City Jail.

Ang akong nahibaw-an dunay x-ray machine ang City Jail. Ang tanan nga mosulod niini moagi sa x-ray ug kapkapan sa mga gwardiya. Kon ngano nga nakasulod ang mga cellphone, ang mga gwardiya ra ang nakahibawo. Samtang gihatagan ni Mayor Tomas og dakong pagtagad ang problema sa City Jail nga makasulod ang mga celphonr, apan ang problema sa mga guba nga dalan iya lang gibaliwa. Morag iyang pauntoson ang mga supporter ni kanhi Mayor Rama lakip na ang iya.

Sa lain bahin, madaugon si Mayor Tomas kay ang iyang gusto maoy natuman. Gihatagan siya sa DILG og katungod nga motudlo sa acting barangay kapitan sa Ermita human gisuspenso ang mga opisyales.

Si SPO1 Adonis Dumpit ang gitudlo ni Mayor Tomas nga acting barangay captain sa Ermita. Alang ni Mayor Tomas si Dumpit ang angayan ibutang sa Ermita aron masumpo ang problema sa negosyo sa ilegal drogas.

Matud pa ni Mayor Tomas gikahadlokan gihapon si Adonis sa mga kriminal ug sa mga nagnegosyo og ilegal nga drogas. Si Kon. Dave Tumulak overqualified nga molingkod nga kapitan, pung pa ni Mayor Tomas. Congrats Don Dumpit! Hinaut nga imong masulbad ang problema sa drugas sa Ermita.