WALA sa pagtrabaho ang pag-asenso. Wa usab kini magdepende sa edad sa usa ka tawo. Ang tanan nag-agad sa paningkamot uban sa bendisyon sa Ginuo.
Mao ni ang kasinatian sa usa ka kanhi construction worker, parking aide ug traffic enforcer nga si Paul Pedrigal Langbid, 45.
Bata pa si Paul, namanso na siya sa pagtrabaho gumikan sa gamay nga negusyo sa iyang mga ginikanan nga mao ang pagpamaligya og tsenilas.
Bisan sa iyang sayo nga kaminyuon naglisod siya tungod sa ordinaryo niyang trabaho.
Si Paul lumad sa Barangay Perrelos, dakbayan sa Carcar, nagdumala na karon sa ilang P&M Construction Services ug CDM Hardware sa mao nga siyudad.
Apan pipila ka mga tuig ang nakalabay, wa siya magdahom nga mamahimong contractor.
Sa batan-on pa siya, nahimo siyang construction worker sa Tacloban City niadtong 1986 hangtod 1987, diin foreman ang iyang uyoan.
Si Paul niasoy nga niadtong 1975, siya ug iyang ginikanan mobiyahe paingon sa Talibon, Trinidad, Alicia ug Ubay sa lalawigan sa Bohol aron maninda og tsinelas gikan sa dakbayan sa Carcar.
Hangtod nga siya nitungtong sa high school, mao gihapon ang panginabuhi sa pamilyang Langbid, diin siya maoy ikaduhang anak sa iyang mga ginikanan nga sila si Olympio ug Lucia.
Pag-graduate niya sa sekondarya, nitrabaho una siya isip construction worker sa Tacloban City sa wa pa mobalik dinhi sa Sugbo ug nieskwela sa kursong Bachelor of Arts major in Business Administration ( BSBA) sa University of San Jose Recoletos (USJ-R).
Apan magabii ra siya moeskwela kay sa adlawan, nagtrabaho siya isip parking aide ug traffic encorcer gikan sa 1988 hangtod sa 2011.
Gugma
Sa tunghaan, iyang nahimamat ang iyang asawa nga si Marife Gevero.
Dihang second year college na sila, naglisod si Marife sa kapuy-an mao nga gidapit siya ni Paul sa iyang boarding house, apan wa sila mag-ipon.
Nimabdos ang iyang asawa samtang sila pulos pa mga estudyante.
Naglisod siya og samot kay ang ilang gisaligan mao ra ang iyang honorarium isip traffic aide nga P1,300.
Nisamot pa ang ilang kalisod sanglit paglabay sa usa ka tuig, namabdos na usab si Marife.
Niadtong 1994 nahimugso ang ilang kamanghurang anak.
“Grabe ang kalisod niadto ug giingnan na gud ko sa mga igsuon sa akong asawa nga kining mga bataa, dili na gyud ni makabalay kay grabe sunodsunod ang mga anak,” paghinumdom pa ni Paul.
Aron makatabang sa iyang bana, kinsa nagplano sa pagpadayon sa iyang pagtungha, si Marife nilarga gawas sa nasod aron manrabaho isip caregiver.
Nipadayon si Paul sa iyang pagtungha panahon sa gabii hangtod naka-graduate sa kurso nga iyang gisugdan.
Niadtong 2011, ni-retire siya aron motutok sa panginabuhi gawas sa gobiyerno.
Iyang giseryuso ang pagpangontrata nga maoy kanhi niya sideline.
Ang gamay niyang tinigom gilukat niya og mga papelis alang sa iyang construction services.
Natumong nga niabli ang Mabuhay Philippine Cement Corporation ug iyang serbisyo ang nakakuha sa pagpamintal sa edepisyo.
Gumikan sa maayo niyang performance, nakadaog usab siya sa bidding sa mga project sa Taheiyo Cement ug didto nisugod paglambo ang iyang panginabuhi.
Matod niya nga kaniadto nabuhi siya sa pagpangutang sanglit magpaabot ra siya sa sweldo matag petsa 15 ug 30 ug magdali pa siya og mata aron di ma-late sa alas 8:00 nga time-in.
Sa pagkakaron, si Langbid nakapalit na og mga propiedad sama sa yuta, sakyanan, motorsiklo ug kagamitan sa iyang construction services.
Matod niya nga di kini niya maabot kon nagpabilin pa siya sa poder sa pagpanerbisyo sa gobiyerno.
Siya nitambag sa mga taw nga adunay mga kalisdanan sa pagpuyo gumikan sa kakabos sa dili paghurar, inay mangita og paagi, uban sa pangaliya sa Ginoo nga buligan ang pagpaningkamot, kay moabot ra ang panahon sa maayong ani.