WALAY igong epekto sa dakbayan sa Lapu-Lapu ang panawagan sa nasudnong welga sa trans­portas­yon kagahapon.

Apan ang lokal nga kagamhanan sa Lapu-Lapu andam sa pagtabang sa mga sumasakay pinagi sa mga sakyanan nga gipanag-iya sa kagamhanan.

Pipila sa mga PUJ drayber sa Opon ang pada­yon sa ilang pagpamasada taliwala sa panawagan sa transport coalition group nga magwelga agig protesta sa tinguhang pag-phase out niadtong jeepney nga karaan na kaayo.

Gipahibawo sa City Disaster Risk Reduction Management Officer, Andy Berame nga adunay duha ka city bus ug upat ka Isuzu Elf truck/van ang on-stand by sa higayon nga mangatanggong ang mga pasahero gikan o mopauli sa dakbayan.

Gawas sa maong mga sakyanan adunay back-up nga barangay vehicles sa higayon nga dili ma-ato og hakot sa stranded passengers.

Atol ning pagsuwat sa balita ang buhatan ni Berame nagpaniid sa sitwasyon sa dagan sa PUJs sa siyudad, lakip nga ilang gisusi ang PUJ terminal nga sa barangay Pajo, Lapu-Lapu ug Parkmall terminal, Mandaue City.

Gisusi sab sa City Traffic Management System (CTMS) ang PUJ terminal sa Pajo, nasuta nga way planong mosalmot ang mga drayber sa welga.