HAYAN mag-atubang og kaso ang tag-iya sa spillway nga gitukod sa pribadong tawo nga milatas sa suba sa Mananga sa dakbayan sa Talisay.
Usa kini sa gitumbok nga hinungdan sa pagkaguba sa riprap sa kilid sa suba sa Mananga sa miaging buwan atol sa pagbunok sa uwan ug dakong baha.
Si Mayor Eduardo Gullas wala mahimuot human nabutang sa peligro ang mga nagpuyo sa Gawad Kalinga Village sa Barangay Lawaan-2.
Gitumbok sa mayor ang spillway nga gitukod sa usa ka Marciano Parba maoy nakaingon nga naguba ang riprap tungod kay naalihan na ang tubig sa spillway ug nipaingon ngadto sa riprap.
Si Engr. Gamaliel Vicente Jr. sa Talisay City Engineering Department nibutyag nga nagkaistorya na sila ni Gullas ug iya kining gisugyot nga ila na lang ayuhon ang nagubang riprap aron dili kuyaw sa mga tawo.
Samtang dili na lang sila sila magpaabot pa nga ipaayo o ba kaha gastohan ni Parba.
Matod ni Vicente nga ila kining ayuhon samtang mag-agad siya sa hukom ni Gullas kon iya bang pabayran kini ni Parba ang nagasto sa siyudad.
Nagkanayon si Vicente sa higayon nga makahukom ang mayor nga pabayran ni Parba, ang City Legal Office maoy modumala o ila bang ikiha si Parba sa higayon nga magmagahi kini sa pagbayad.
Si Vicente niingon nga posible nga karong semanaha sugdan na ang pag-ayo sa nagubang riprap sa Mananga.
Samtang ayuhon usab ang karsada nga kaagian sa mga tawo ilabi na sa mga tinun-an.
Sa pagkakaron, ang gitukod nga riprap wala pa hingpit nga maguba kini bisan pa sa kamandoan ni Gullas nga ip-guba kini sa labing dali nga panahon.
Dugang sa mayor, gawas nga nakaingon kini nga maalihan ang tubig sa Mananga, wala usab kini permit gikan sa Department of Environment and Natural Resources (DENR).
Nagduda si Gullas nga gawas sa mga tawo nga makaagi, gituyo ni Parba nga maghimo og spillway nga maagian og sakyanan tungod ang atbang nga yuta sa sapa gipanag-iya niini ug posibling aduna siyay plano sa pag-ugmad sa dapit.