DILI na unya makahimo og komunikasyon sa ilang mga kaila ug paryente gawas sa prisohan kadtong mga nagtinir pa og cellphone ug uban pang communication gadgets sulod sa Cebu Provincial Detention and Rehabilitation Center (CPDRC).
Kini human gipahibalo sa Kapitolyo nga niining semanaha, i-install na ang signal jammers diha sa CPDRC compound aron pagpakgang sa mga posibleng ilegal nga mga transaksiyon.
Giingong duna gihapoy inmates nga padayong nakagamit ug mga communication gadget, sama sa cellphone, sulod sa CPDRC, bisan paman sa kahugot na sa seguridad nga gipatuman. Pipila kanila naka-himo pa ug mga status sa social networking site nga Facebook ug duna sa’y naka-upload og pictures, nga kuha mismo diha sulod sa ilang selda.
Si Gob. Hilario Davide III nga gikuhaan ug reaksiyon labot niini, miingon nga istrikto gyud ang gipatuman nga seguridad ug gidili gyud ang cellphone ug uban pang sulod sa prisohan.
Apan wala niya gipadaplin ang posibilidad nga duna gyud gihapoy nakalusot, ilabi na kadtong dugay nang gitagu-an sa inmates o dib a kaha, dunay mga guwardiya nga makagpahulam niini ngadto sa mga piniriso.
Dugang niya, possible usab nga laing tawo lang ang nagamit sa account sa inmates nga aktibo gihapon sa social media bisan ug anaa sa bilangguan.